Politikë

Vetëm tre ditë na ndajnë nga zgjedhjet vendore, ndërsa më datë 14 maj qytetarët do të shkojnë në kutinë e votimit për të votuar për kryetarët e rinj të bashkisë në 61 bashkitë  e vendit, si edhe për këshilltarët bashkiakë.

Vetëm dy ditë kanë mbetur nga fushata zgjedhore dhe kandidatët kanë intensifikuar takimet me qytetarët me qëllim prezantimin e programeve të tyre elektorale, për t’i bindur qytetarët që t’u japin votën në 14 maj.

Kandidati i Partisë Demokratike për Tiranën, Roland Bejko u ndal në një takim me qytetarët në zonën e Kinostudios. Ndërsa u dha programin për Tiranën, Bejko dëgjoi edhe shqetësimet e tyre, ku një prej tyre ishte prishja e banesave nga Erion Veliaj.

Nga kompleksi i ri sportiv ‘Partizani’, kryetari i Bashkisë së Tiranës, Erion Veliaj dhe deputeti i PS, Xhemal Qefalia, u takuan me banorët e Tufinës, Freskut, Dajtit, Zall-Herrit, Shëngjergjit e Zall Bastarit.

Nga shkolla e fëmijërisë, “Kosova”, moderatori i njohur sportiv Shakohoxha i uron Erion Veliajt fitoren në zgjedhjet e 14 majit.

Dërgimi i mesazheve me qëllim elektoral në celularët e qytetarëve nga partitë politike apo kandidat është i paligjshëm. Me këtë deklaratë, Komisioneri për të Drejtën e Informimit dhe Mbrojtjen e të Dhënave Personale, Besnik Dervishi, ka paralajmëruar për penalizime të të gjithë subjekteve zgjedhore që e kanë bërë apo do të vijojnë ta bëjnë një gjë të tillë.

Debatin në lidhje me deklaratat e koalicionit Berisha-Meta për helenizim të Himarës, Fredi Beleri, i ka komentuar edhe kryetari i Partisë së Lirisë, Ilir Meta. Duke e cilësuar këtë si lajm të dalë nga ‘kuzhina e Ramës’, Meta tha në ‘Opinion’ që Rama është i tmerruar nga humbja në Himarë dhe ndaj ka filluar sulmet ndaj Belerit.

Për herë të parë pas 20 vitesh, një president polak ka zhvilluar një vizitë zyrtare në Tiranë. Andrzej Duda u prit me ceremoni shtetërore nga homologu Bajram Begaj, e më pas zhvilluan një konferencë për shtyp. Mesazhi nga presidenti polak ishte i qartë, ku theksoi se Shqipëria duhet të bëhet sa më shpejt pjesë e Bashkimit Europian.

Partia Bashkimi për të Drejtat e Njeriut i ka konsideruar deklaratat e Kryeminsitrit Edi Rama për kandidatin e Bashkisë së Himarës Fredi Beleri si polarizim ekstrem të klimës parazgjedhore në këtë bashki. 

Më shumë se një betejë opozitë-qeveri, këto zgjedhje vendore janë konsideruar si ‘betejë’ mes dy krahëve të PD-së. Lidhur me këtë situatë, deputeti democrat, Lefter Gështenja tha se ai personalisht nuk ka qenë për nxjerrjen e kandidatëve të tjerë përballë atyre të koalicionitr Berisha-Meta, duke qenë se zyrtarizimi i tyre u bë vetëm tre ditë para mbylljes së afatit.

Kreu i Rithemelimit ka mbyllur takimet e fushatës elektorale për bashkinë e Durrësit, të cilëve u ka kërkuar votën për kandidatin Igli Cara. Gjatë këtij takimi mungonte, deputeti i PD-së, Ferdinand Xhaferraj, i cili siguroi më së shumti vota si deputet i këtij qarku në zgjedhjet e vitit 2021. 

Edhe pse e konsideron si ‘shtëpinë e tij politike’ apo edhe një bastion demokratësh, Sali Berisha është braktisur edhe nga Kavaja. Siç mund të shihet edhe nga pamjet, në takimin përmbyllës të fushatës së koalicionit Berisha-Meta në Kavajë, numri i pjesëmarrësve ishte shumë herë më i ulët. 

Kryetari i Partisë Socialiste, Edi Rama ka mbajtur sot takimin për mbylljen e fushatës në Fier dhe Lushnjë, ku ka kërkuar që qytetarët të votojnë Armando Subashin dhe Eriselda Sefën për një mandat tjetër në krye të këtyre bashkive