Dita e sotme është një ditë feste për të gjithë shqiptarët. Si sot, 106 vite më parë, më 28 nëntor 1912, u shpall Pavarësia e Shqipërisë në Vlorë. Autoritetet e larta shtetërore kanë zhvilluar homazhe te "Ushtari i panjohur" në Vlorë. Ceremonitë zyrtare kanë bërë bashkë kryeministrin Edi Rama, kryeparlamentarin Gramoz Ruci dhe presidentin Ilir Meta të cilët kanë vendosur kurora me lule, ndërsa kanë marrë pjesë edhe anëtarë të kabinetit qeveritarë e deputetë. Pjesë e homazheve ka qenë edhe zv/kryeministri i Kosovës, Behgjet Pacolli.
Nga ana tjetër opozita nuk ka udhëtuar në qytetin e Pavarësisë, por ka festuar e vetme në Tiranë. Kryetari i PD, Lulzim Basha, ish-kryeministri Sali Berisha, ish-presidenti Bujar Nishani si dhe deputetë e mbështetës të opozitës, kanë zhvilluar homazhe te "Varrezat e Dëshmorëve" në kryeqytet. Ndasitë e thelluara politike mes maxhorancës dhe opozitës janë reflektuar edhe te festa kombëtare e shqiptarëve e cila duhet të shërbente si ditë unifikimi.
Urime të shumta kanë ardhur edhe nga liderë botërore si: presidenti rus Vladimir Putin, presidenti amerikan Donald Trump, presidenti italian Sergoi Mattarella, presidenti turk Recep Tajip Erdogan, etj.
106 vjet shtet i pavarur
Ismail Qemali, bashkë me patriotë të tjerë dhe atdhedashës zgjodhën këtë datë për të ngritur flamurin dhe për të shpallur Pavarësinë e Shqipërisë. Kjo datë është quajtur si “nëntori i dytë”, pasi këtë datë zgjodhi edhe Heroi ynë Kombëtar Gjergj Kastriot Skënderbeu për Clirimin e Krujës në 28 nëntor 1443.
Ditën e sotme, janë parashikuar një sërë aktivitetesh, ndërkohë që presidenti Meta dhe Kryeministri Rama do të jenë në Vlorë në një aktivitet për festimin e 28-nëntorit.
Me rastin e kësaj feste, ka reaguar i pari kryeministri Edi Rama, i cili ka uruar shqiptarët me një foto nga takimi me kryeministrin kosovar Ramush Haradinaj me duart mbi flamurin kuqezi. Pas Ramës ka reaguar edhe presidenti Meta, i cili ka uruar shqiptarët me rastin e kësaj feste.
Sekretari amerikan i Shtetit, Mike Pompeo ka uruar Shqipërinë për 106 vjetorin e shpalljes së pavarësisë. Ai shprehet se Shtetet e Bashkuara të Amerikës ndihen krenarë për lidhjen e fortë midis popujve dhe se mirëpret në vitet vijuese partneritetin dhe bashkëpunimin midis vendeve.
Deklarata e Sekretarit amerikan të Shtetit, Mike Pompeo është përcjellë nga Ambasada Amerikane, përmes rrjetit social "Twitter".
Deklarata e Sekretarit amerikan të Shtetit Mike Pompeo, publikuar nga Ambasada Amerikane
Presidenti i Turqisë Recep Tayyip Erdogan në mesazhin e tij shumë miqësor për festën e 106-vjetorit të Pavarësisë shkruan se vendi i tij i kushton një rëndësi të madhe zhvillimit të marrëdhënieve dypalëshe që burojnë nga lidhjet e miqësisë dhe të vëllazërisë.
"Lidhjet janë të mbështetura në historinë tonë të përbashkët. Janë për t’u vlerësuar sukseset e vendit tuaj në integrimin evropian dhe në zhvillimin ekonomik. Ne e ndjekim me kënaqësi kontributin e këtyre sukseseve, si për vendin Tuaj ashtu edhe për stabilitetin në Ballkan,”-thotë Erdogan.
Urimeve të presidentëve botërorë për 106-vjetorin e Pavarësisë së Shqipërisë i është bashkuar edhe presidenti gjerman, Frank-Walter Steinmeier. Në mesazhin e tij, ai thekson se Shqipëria është për Gjermaninë një partner i ngushtë dhe i besuar në Ballkanin Perëndimor duke siguruar se vendi i tij do të vazhdojë të mbështesë vendin tonë në mënyrë aktive në rrugën e saj drejt Bashkimin Evropian.
"Vendi juaj ka ndërmarrë vitin e shkuar përpjekje të mëtejshme të spikatura për të ardhur më pranë anëtarësimit në Bashkimin Evropian. Tani është e rëndësishme që Shqipëria të vijojë të ndjekë këtë objektiv në mënyrë të vendosur, duke u mbështetur në bashkëpunimin konstruktiv të të gjithë aktorëve politikë të vendit në interes të së mirës së përgjithshme”, presidenti Steinmeier.
Presidenti Italian Sergio Mattarella, në mesazhin e tij të urimit për festën e 106-vjetorit të Pavarësisë shkruan se përkujtimi i Skëndërbeut forcoi marrëdhënien dypalëshe mes dy vendeve.
“Përkujtimi i përbashkët së fundmi i figurës së Gjergj Kastriotit Skënderbeu, forcoi më tej jo vetëm marrëdhëniet dypalëshe por edhe ndjenjën e ndarjes bashkërisht të faqeve të rëndësishme të historisë – siç u dëshmua konkretisht nga pakica arbëreshe mjaft aktive – si dhe të horizonteve të përbashkëta në gjirin e familjes evropiane dhe të komunitetit euro-atlantik,”-Sergio Mattarella.
Me rastin e festave të nëntorit, presidenti i Shteteve të Bashkuara të Amerikës, Donald J. Trump i ka dërguar një mesazh urimi homologut të tij shqiptar, Ilir Meta.
"Jemi krenarë për marrëdhënien e fortë që dy kombet tona kanë zhvilluar dhe arritjet domethënëse që kemi realizuar së bashku. Shqipëria është një aleate e vyer, që ka dhënë një kontribut domethënës për sigurinë rajonale dhe atë globale,”-shkruan Trump.
Urimeve për 28 nëntor ditë e shënimit të Pavarësisë së Shqipërisë i është bashkuar edhe Ambasadori i Bashkimit Europian në Tiranë, Luigi Soreca i cili u ka shprehur të gjithë qytetarëve shqiptar urimet më të mira në këtë ditë historike.
Përmes një postimi në rrjetin e tij social në “Tëitter”, Soreca krahas mesazhit të urimit shprehet se BE do të vijojë të mbështesë Shqipërinë në kryerjen e reformave për realizimin e integrimit të vendit.
“Gëzuar Ditën e Pavarësisë Shqipëri!Urimet më të mira për të gjithë shqiptarët në këtë ditë të veçantë! Bashkimi Evropian është i angazhuar të vazhdojë të mbështesë Shqipërinë në kryerjen e reformave të nevojshme për realizimin e ëndrrës evropiane të popullit shqiptar. #BEpërShqipërinë”, shkruan Ambasadori i Bashkimit Europian, Luigi Soreca.
Presidenti rus, Vladimir Putin ka uruar presidentin Ilir Meta për ditën e pavarësinë së Shqipërisë. Në një postim në “Facebook”, ambasada ruse ka publikuar mesazhin që Putin i ka nisur presidentit Meta. Në mesazhin e urimit, Putin shprehet se zhvillimi i marrëdhënieve konstruktive dhe bashkëpunimit dy palësh në fusha të ndryshme do të ishte në interes të të dy vendeve.
Urimi i Putin për Metën:
I nderuar zoti President,
Pranoni urimet e mia me rastin e festës kombëtare të Shqipërisë, Ditës së Flamurit. Jam i sigurt se zhvillimi i marrëdhënieve konstruktive dhe bashkëpunimit dypalësh ruso-shqiptar në fusha të ndryshme do të ishte në interes të popujve të dy vendeve tona, si edhe të gjithë Evropës. Ju uroj Juve shëndet dhe suksese, ndërsa të gjithë bashkëqytetarëve Tuaj u uroj mirëqenie dhe begati.
Me respekt,
Vladimir Putin
Moskë, Kremlin
Më 28 nëntor 2018
Protesta e banorëve të Unazës së Re, ka rinisur ditën e sotme në ditën e 25-të të saj. Në protestën e sotme, banorët kanë shpalosur flamuj kuqezi duke ‘lënë mënjanë’ protestën për disa minuta.
Në protestë ndodhen sërish deputetë të Partisë Demokratike, ndërkohë që banorët kanë bllokuar rrugën.
.jpg)
Flamuri kuqezi i shpalosur nga banorët e Astirit
Kryetari i Bashkisë Tiranë, Erion Veliaj, ka qenë i pranishëm në sheshin Skënderbej në një ceremoni me rastin e Ditës së Pavarësisë. Veliaj tha se kjo ditë shërben për të kuptuar progresin që duhet të vazhdojë dhe që zhvillimi i Tiranës të ecë me ritme të shpejta. (Lexo këtu për fjalën e plotë të Veliajt)
“Tirana në ato ditë nuk ishte kryeqytet, sot ka rol të rëndësishëm, e megjithatë, njerëz të shquar të këtij qyteti Toptani, qyteti i Tiranës. Sot do na duhet të marrim vendime të rëndësishme për të qenë Shqipëria e pavarur, sot lipset që të ketë progres, që të respektohet fjala e tyre. Nqs do dëgjojmë minoracën që thotë duam babanë nuk do kishim shumë gjëra. Prandaj miqtë e mi jemi më të vendosur se kurrë. Vendimet nuk janë të lehta, as Pavarësia as Çlirimi dhe sot as vendimet që Tirana të progresojë dhe zhillojë nuk Brenda arsyes së këtij kombi besoj se Tirana i ka ditët më të mira përpara. Duhet të vazhdoj non stop me marshin e pestë.”-u shpreh Veliaj.
Presidenti i Republikës, Ilir Meta, ka folur pak pas përfundimit të ceremonisë së homazheve për 106-vjetorin e Pavarësisë. Meta ka thënë se përkulet me respekt para veprës së Ismail Qemalit, themeluesit të shtetit shqiptar.
"Gëzuar Ditën e Flamurit Kombëtar të gjithë shqiptarëve kudo ndodhen. Emocion i veçantë të merrja pjesë sot në Vlorë, "kryeqytetin" e Festës së Pavarësisë, në ceremoninë shtetërore për nder të simbolit më përbashkues të shqiptarëve. Përkulem me respekt para veprës së përjetshme të themeluesit të shtetit shqiptar, Ismail Qemali.", - u shpreh Presidenti Meta për gazetarët.
Me rastin e 106-vjetorit të Ditës së Pavarësisë, kryeministri kosovar Ramush Haradinaj iu ka shërbyer policëve disa ëmbëlsira.
Në fotot e shpërndara nga mediat kosovare shihet kryeministri Haradinaj duke iu dhënë policëve ëmbëlsira me rastin e kësaj feste.
Kryeministri Ramush Haradinaj duke iu shërbyer ëmbëlsira policëve me rastin e Ditës së Pavarësisë
Kjo nuk është hera e parë që Haradinaj iu shërben policëve. Me rastin e ditës së Pavarësisë së Kosovës më 17 shkurt të 2018, Haradinaj iu shërbeu kafe policëve.
Kryetari i Partisë Demokratike, Lulzim Basha bashkë me Sali Berisha dhe anëtarët e grupit parlamentar të PD, kanë zhvilluar festime të ndarë. PD ka zhvilluar homazhe tek “Dëshmorët e Kombit”, dhe kryetari Lulzim Basha theksuar se lufta për liri dhe demokraci vazhdon ende.
Gëzuar nga zemra gjithë shqiptarëve në ditën e flamurit dhe atë të çlirimit. Sot përulemi para Skënderbeut flamuri kuq e zi që u ngir në shtëpinë e tyre në 28 Nëntor 1443, përulemi para Ismail Qemaliut, përulemi para Ushtrisë Nacional Çlirimatre që u flijuar për çlirimin, përulemi para komandantit Legjendar Adem Jashari i cili ka ditëlindjen sot. E konsideroj ditën e sotme si një ditë ftese për të gjithë shqiptarët në një betejë për të garantuar liritë e tyre siç shkruhet në kushtetutë.
Lulzim Basha, kryetar i PD
Me rastin e ditës së Pavarësië, kryeministri Edi Rama dhe presidenti Ilir Meta, shoqëruar dhe nga kryetari i Kuvendit, Gramoz Ruci, bashkë me personalitete të tjera të politikës shqiptare, janë bërë bashkë në Vlorë, në ceremoninë e ngritjes së flamurit.
Meta dhe Rama kanë zhvilluar homazhe tek monumenti i ‘Ushtarit i Panjohur’. Ata kanë vendosur kurora me lule tek ky bust.
Një urim i veçantë ka ardhur nga ana e Ambasadës së Shteteve të Bashkuara në Shqipëri, në ditën kombëtare të Flamurit. Përmes një postimi në faqen zyrtare në Facebook Ambasada Amerikane i uron të gjithë qytetarët për përvjetorin e 106 të Pavarësisë së Shqipërisë. përmes statusit të publikuar në faqen e facebook-ut, Ambasada amerikane evidenton tiparet dhe shpreh virtytet më të larta të si, besa, mikpritja, veshjet popullore, bukuritë natyrore dhe thjeshtësinë e shqiptarëve.
“Gëzuar Ditën e Pavarësisë Shqipëri! Ne i kërkuam personelit tonë amerikan të na tregonin me një fjalë apo frazë se çfarë u pëlqente nga Shqipëria. Ky poster përfaqëson një koleksion të disa prej gjërave tonë më të dashura të Shqipërisë dhe është mënyra jonë për të treguar vlerësimin tonë për këtë vend të mrekullueshëm. A i gjeni dot fjalët?, përpiquni të gjeni të gjitha fjalët, dhe shkruajini ato në hapësirën e komenteve mëposhtë. Le të shohim se sa do të gjeni!”, shkruhet në njoftimin e Ambasadës Amerikane në Shqipëri.
A i gjeni dot fjalët? Shkarkoni posterin me rezolucion të lartë këtu
Presidenti Ilir Meta ka uruar me një poezi ditën e Pavarësisë. Meta ka publikuar në Facebook një pezi të recituar nga dy nxënëse shqiptare të shkollës 9-vjeçare në Dacaj të Rozhajës. Disa nga vargjet e poezisë:
Gjithmonë shqipja na mësoi si të mbrojmë gjuhë, komb e atdhe
Si ta zhdukim robërinë dhe të kemi ne lirinë
Shqiptarët me flamurin, liri e shtet gëzofshi përjetë
Me fat 28 nëntori viti 1912
Postimi i Metës në Facebook:
Gëzuar Ditën e Flamurit Kombëtar!
Një urim të veçantë për çdo shqiptar kudo ndodhet, me këtë poezi, të recituar me shpirt, shumë dashuri dhe emocion nga dy nxënëse shqiptare të shkollës 9-vjeçare në Dacaj të Rozhajës.
Postimi i Metës në Facebook
Sot shënohet 106 vjetori i Pavarësisë së Shqipërisë dhe kjo ditë festohet nga shqiptarët në të gjithë botën kudo ndodhen. Urimi i parë ka ardhur nga kryeministri Edi Rama përmes një postimi në rrjetet sociale.
Kreu i qeverisë e ka shoqëruar urimin e tij me një foto të veçantë nga takimi i dy qeverive në Pejë, teksa ai dhe kryeministri i Kosovës, Ramush Haradinaj bashkojnë duart mbi flamurin kombëtar, në përfundim të nënshkrimit të marrëveshjeve të rëndësishme mes Shqipërisë dhe Kosovës. “MIRËMËNGJES dhe GËZUAR DITËN E FLAMURIT”- shkruan Rama.
Postimi i Ramës në Facebook
Lajme të tjera
-
Po tani, ka drejtësi zoti Berisha ?
27 Nëntor, 22:37
-
GJKKO i hoqi 'arrestin shtëpiak' Berishës, Kthupi në 'Repolitix': Praktikë gjyqësore, dosja ka shkuar për hetim, Berisha nuk prish më provat! Gazetari: Bien akuzat e PD për kapje të drejtësisë
27 Nëntor, 21:39 -
Spahiu: Dyshoj se për 10 vjet, nuk ka gjykatë që guxon të dënojë Berishën dhe Ramën
27 Nëntor, 21:15 -
Elezi në Report Tv: Berisha nga Partia Komuniste, dështoi me protestën! Toska: Fije shprese për mbështetësit
27 Nëntor, 21:11 -
Evi Kokalari reagon për lirimin e Berishës: Mos u gëzoni kot, s’ka lidhje administrata e Trump! Më intereson investigimi i kullës së malit, për atë më bënë kurban!
27 Nëntor, 19:10 -
Jakin Marena: Berisha ‘xhiroi bosh’ një vit, rikthim në pikën zero, pa kauza e alibi
27 Nëntor, 19:03
-
Falenderoi gjyqtaren që e liroi, por çfarë thoshte Berisha pak ditë më parë për të
27 Nëntor, 18:33
-
Ylli Pata: Mitet që rrëzoi dhe precedenti që hapi lirimi i Sali Berishës
27 Nëntor, 18:18
-
I dhj….rë , por krenar!
27 Nëntor, 18:05
-
Berisha u lirua nga 'arresti shtëpiak', Haklaj për Report Tv: Bie alibia e tij se drejtësia është e kapur! Anëtarja e FRPD: Vendimi i vonuar, mosbindje civile deri në qeveri teknike
27 Nëntor, 18:01 -
Kreshnik Spahiu: Gjykata e 'Ramës' apo gjykata e pavarur e liroi shtetasin Berisha?
27 Nëntor, 17:00
-
Misioni diplomatik në Bruksel hap dyert për shqiptarët, Rama: Bëhu pjesë e 'Team Albania', kontribuo në anëtarësimin e vendit në BE
27 Nëntor, 16:25
