24 orë pas zbulimit të depos rekord me 12 ton kanabis në Përmet, Policia e Shtetit në bashkëpunimin me prokurorinë kanë marrë masa të ashpra ndaj 8 punonjësve, duke shkarkuar 2 komisarë, përjashtuar një inspektor, ndërsa ka nisur procedimi disiplinor për 5 drejtues mes tyre drejtorin e Policisë së Qarkut.
 
Për Drejtorin e Policisë së Qarkut Gjirokastër, Aranit Arapi ka filluar procedimi disiplinor për shkelje të Rregullores së Policisë së Shtetit.
 
Po ashtu ka filluar procedimi disiplinor edhe për zëvendësdrejtorin për Hetimin e Krimeve, Fatmir Hoxha, Shefin e Sektorit për Hetimin e Trafiqeve Agim Fejzo, Gentjan Shehun me detyrë Shef i Seksionit për Hetimin e Narkotikëve dhe Asim Beqirajn, me detyrë Shef i Seksionit të Sigurisë Publike.
 
Ndërsa Kastriot Ndoj me detyrë Shef Seksioni për Krimet në Komisariatin e Policisë Përmet dhe Ermir Gërxhani, me detyrë Shef i Komisariatit të Policisë janë shkarkuar nga detyra.
 
Inspektor Pëllumb Qamo, me detyrë Ndihmës specialist SPZ, në Njësinë Administrative Piskovë, u përjashtua nga Policia e Shtetit.
 
Masat e policisë vijnë pas arrestimit të dy administratorëve të depove dhe arrestimit të kryeplakut të fshatit ku u gjet kanabisi. 

 
Masat e Drejtorisë së Policisë
•          Inspektor Pëllumb Qamo, me detyrë Ndihmës specialist SPZ, në Njësinë Administrative Piskovë, Bashkia Përmet, për shkelje të rënda të Rregullores së Policisë së Shtetit - u përjashtua nga Policia e Shtetit
 
•          Komisar Kastriot Ndoj, me detyrë Shef Seksioni për Krimet në Komisariatin e Policisë Përmet, për shkelje të rënda të Rregullores së Policisë së Shtetit - u shkarkua nga detyra.
 
•          Kryekomisar Ermir Gërxhani, me detyrë Shef i Komisariatit të Policisë Përmet, për shkelje të rënda të Rregullores së Policisë së Shtetit - u shkarkua nga detyra.
 
•          Komisar Asim Beqiraj, me detyrë Shef i Seksionit të Sigurisë Publike, në Komisariatin e Policisë Përmet, për shkelje të Rregullores së Policisë së Shtetit - filloi procedimi disiplinor.
 
•          Komisar Gentjan Shehu, me detyrë Shef i Seksionit për Hetimin e Narkotikëve, në DVP Gjirokastër, për shkelje të Rregullores së Policisë së Shtetit - filloi procedimi disiplinor.
 
•          Kryekomisar Agim Fejzo, me detyrë Shef i Sektorit për Hetimin e Trafiqeve dhe Narkotikët, në DVP Gjirokastër, për shkelje të Rregullores së Policisë së Shtetit - filloi procedimi disiplinor.
 
•          Drejtues Fatmir Hoxha, me detyrë Zëvendësdrejtor për Hetimin e Krimeve dhe Sigurinë Publike, në DVP Gjirokastër, për shkelje të Rregullores së Policisë së Shtetit - filloi procedimi disiplinor.
 
•          Drejtues i Parë Aranit Arapi, me detyrë Drejtor në Drejtorinë Vendore të Policisë Gjirokastër, për shkelje të Rregullores së Policisë së Shtetit - filloi procedimi disiplinor.
 
Policia e Shtetit, në bashkëpunim me Prokurorinë e Përmetit vijon hetimin për zbardhjen e plotë të veprimtarisë kriminale dhe subjkteve të saj, të grumbullimit, mbajtjes dhe trafikimin e lëndës narkotike zbuluar dhe sekuestruar në datën 8 prill 2017 në Pagri të Përmetit.