2 ditë pas vrasjes së Klodjan Rashës, të rinjtë e Korçës dhe Lezhës në protestë! Hidhen gurë dhe shashka drejt policisë! 50 mln lekë gjobë për organizatorët (VIDEO)

Protestës së zhvilluar në Korçë për vrasjen e Klodjan Rashës, policia ka shoqëruar disa persona në komisariat.

Efektivët kanë shoqëruar organizatorët e protestës, kryetaren e FRPD-së në Korçë po ashtu dhe disa të rinj, pjesë të kësaj partie.

Gjithashtu janë shoqëruar në komisariat dhe disa qytetarë të cilët nuk kanë qenë pjesë e protestës.

Në këtë protestë janë gjobitur dhe 4 persona të cilët ishin organizatorët e këtij tubimi.

Ata janë ndëshkuar me 50 mln lekë për tubim të kundraligjshëm në një kohë ku nuk lejohen me ligj për shkak të masave antiCOVID.

Dhjetra qytetarë, pjesa më e madhe e të cilëve të rinj protestuan dhunshëm në Lezhë për vrasjen nga efektivi i policisë të  25-vjeçarit Klodian Rasha në Tiranë. Protestuesit u grumbulluan pranë obeliskut të Besëlidhjes rreth orës 17:00 të së enjtes dhe pasi ndezën qirinj në përkujtim të të ndjerit, me thirrje "Rama Ik","Drejtësi për Klodin" dhe "Polici e Krimit", marshuan përgjatë rrugës "Luigj Gurakuqi" drejt Komisariatit të Policisë.

Aty ndaluan për disa minuta, duke ndezur qirinj e hedhur shashka e sende të forta në drejtim të godinës së Policisë. Më pas ndalesa e rradhës e protestuesve ishte Prokuroria e Rrethit Gjyqësor Lezhë. Aty rrëzuan derën e institucionit dhe thyen xhamat e vend-qëndrimit të rojës. Pas këtyre veprimeve protestuesit u rikthyen sërish para ambjeteve të policisë ku morën disa kosha mbetjesh dhe i vendosën në hyrjen e këtij institucioni, ndërsa thyen edhe një nga xhamat e dritares të një nga zyrave të Komisariatit të Policisë.

Pasi qëndruan për disa minuta aty protestuesit u zhvendosën drejt sheshit Gjergj Kastrioti, duke dëmtuar disa nga koshat e mbeturinave e zbukurimeve dhe qëlluan me shashka e sende të ndryshme në drejtim të godinës së bashkisë. Më pas qytetarët marshuan drejt hyrjes së qytetit të Lezhës dhe pranë rotondos bllokuan superstradën drejt Tiranës dhe Shkodrës.

Rruga qëndroi e bllokuar për rreth 20 minuta dhe më pas qytetaret e shpërndanë. Nga kjo situatë u krijuar radhë kilometrike automjtesh në të dy anet e superstrades dhe u desh nderhyrja e policisë rrugore për normalizimin e qarkullimit.Ndërkohë protesta e cila zgjati rreth 90 minuta u monitorua nga oficer civil të policisë së Lezhës, por nuk ndërhynë për shpërndarjen e turmes. Gjatë protestes nuk pati fjalime dhe persona të lënduar nga veprimet e dhunshme të disa prej protestuesve.

Për protestën e zhvilluar pasditen e sotme në Korçë ka reaguar zëvendësbashkiakja e këtij qyteti Benila Themeli. Ajo i ka konsideruar të turpshme aktet e të rinjve të cilët qëlluan me gurë drejt Drejtorisë së policisë si dhe djegies së zbukurimeve të festave të fundvitit si dhe thyerjen e xhamave të bashkisë.

Ajo thotë se Korça nuk ka reagim qytetar por thjesht turma të urdhëruara nga politika për t'i vënë zjarrin institucioneve.

Reagimi i plotë i Zv. kryebashkiakes:

"Nuk me ka dhembur syri dhe shpirti asnjehere sa kaq! As ne ‘97 Korca nuk pa kaq vandalizem! I vune flaken pemeve dhe drereve te festes, dhunuan me bresheri guresh xhamat, godinat, policet, gazetaret ...Pedonalja e Korces per mbi 30 minuta ne terror, dhune, tym, flake e bresheri guresh. Isha brenda godines se bashkise, me dhjetra kolege te nderuar, me nena qe femijet i prisnin ne shtepi por nuk dilnin dot, me vajza e djem te rinj si Klodiani ... Mbi ke ata gure? Ndaj kujt? Perse? Femije e te rinj te mbledhur ne nje turme qe as e dinte pse i duhej te godiste Bashkine e Korces kete pasdite. Dikush nga mesi i turmes “zoteria” komandant i grupit vandal, (dallonte kollaj nga te tjeret se ishte “i qete” dhe “i terhequr”), ngrinte doren e bente shenja: Bjer, sulmo, godit, veri flaken, uleri, terhiqu, sulmo prape, merr gure me te medhenj, me fort, edhe me fort ... Dhe turma ulerinte, sulmonte, godiste pa e ditur pse, pa e ditur qe bashkia nuk ka asnje lidhje me vrasjen e Klodianit, madje dyshoj nese ata e kishin degjuar ndonjehere emrin e Klodianit!

Me dhemb ky vend ku po rrit tim bir, ky vend ku nuk ka reagim qytetar por turma te urdheruara nga politika per t’i vene zjarrin institucioneve, turma qe perdoren nga ata qe iu vret syte drita e asaj godine dhe puneve te shkelqyera qe bashkia ka bere. Turma goditi xhamat, muret brenda te cilave urdheruesit e tyre enderrojne te jene. Nuk rrezohen me dhune pushtetet! Nuk perdoret kaq shemtuar dhimbja e nje babai qe publikisht u shpreh kunder kesaj marrezie qe po ndodh! Nuk! Nuk! Nuk! Kane sy, veshe e mend njerezit e ketij qyteti! Kane qytetari korcaret! E kane treguar per vite me radhe qe dine te zgjedhin punen ne vend te gureve, njerezit ne vend te vandaleve, dritat ne vend te djegies se tyre. Korcaret nuk jane kjo turme e telekomanduar nga politika! Kjo nuk eshte Korca! Kjo nuk eshte Shqiperia ime, Shqiperia jone! TURP! TURP! TURP!

Vrasja e Klodjan Rashës nga një polic, ka bërë që në disa qytete të Shqipërisë të zhvillohen protesta. Me dhjetëra qytetarë, pjesa më e madhe të rinj, janë mbledhur në Lezhë për të kërkuar drejtësi për Klodjanin. Sot është dita e dytë e kësaj proteste, ku të rinjtë janë mbledhur pranë obeliskut të Besëlidhjes.

Qytetarët me qirinj të duar kërkojnë drejtësi për këtë ngjarje të rëndë. Protestuesit kanë marshuar drejt policisë dhe janë mbledhur para komisariatit duke hedhur shashka në drejtim të godinës si dhe kane bllokuar rrugën

Protestuesit në Korçë kanë thyer xhamat e Bashkisë së qytetit si dhe u kanë vënë flakën disa zbukurimeve që janë vendosur për festat e fundvitit.

Momentalisht ka ndërhyrë policia për të shpërndarë protestën.

Protesta që nisi paqësore në Korçë ka agravuar në dhunë.

Disa të rinj kanë goditur me shishe dhe gurë drejt policëve në Drejtorinë e Policisë në Korçë.

Report Tv mëson se ka mbetur një efektiv i plagosur nga gurët e qëlluar drejt tyre.

Mësohet se kjo protestë është iniciuar nga Forumi Rinor i PD-së ku janë mbledhur rreth 100 të rinj.