Komiteti Ekzekutiv (KE) i Federatës Shqiptare të Futbollit (FSHF) ka miratuar vendimin për krijimin e një programi të posaçëm mbështetjeje financiare për klubet profesioniste të futbollit, në vijim të angazhimit të marrë në Asamblenë e Përgjithshme dhe në funksion të forcimit të qëndrueshmërisë së sistemit futbollistik në vend.

Programi, me një vlerë totale prej 3 milionë eurosh për vitin 2026, do të jetë i dedikuar për klubet profesioniste pjesëmarrëse në Superligë dhe Kategorinë e Parë.

Mbështetja do të jetë e institucionalizuar, e strukturuar dhe e parashikueshme, duke synuar që suksesi financiar i FSHF-së të reflektohet në mënyrë të prekshme te klubet, të cilat përbëjnë bazën e sistemit të futbollit shqiptar.

Shpërndarja e fondit do të realizohet në dy faza, në përputhje me fazat sportive të kampionateve. Faza e dytë e sezonit 2025-26 dhe faza e parë e sezonit 2026-27. Ndarja bazohet vetëm në kategorinë ku luan klubi, jo në renditjen sportive dhe bëhet në mënyrë të barabartë brenda secilës kategori.

Klubet e Superligës përfitojnë një shumë më të lartë krahasuar me ato të Kategorisë së Parë, në përpjesëtim me kostot më të larta sportive dhe organizative në këtë nivel.

Fondet do të lëvrohen në dy këste, ku pjesa e parë do të shpërndahet në fillim të vitit 2026 për të mbështetur likuiditetin dhe planifikimin e klubeve për pjesën e mbetur të sezonit, ndërsa kësti i dytë pas përfundimit të sezonit 2025-26 dhe përcaktimit të strukturës së kampionateve për sezonin 2026-27.

Shpërndarja e e këtij fondi për klubet do të nisë zyrtarisht në janar 2026.