21 gola në 37 ndeshje, Inter gjen 'Lukakun e ri' te Arsenali

Inter duket se ka gjetur zëvendësuesin e Romelu Lukakut dhe ai nuk është Alvaro Morata. Spanjolli që ka qenë më parë pjesë e Juventusit nuk ka rënë dakord për termat ekonomikë dhe personalë në kontratë, duke bërë që zikaltërit të hidhen në treg sërish. Siç bëjnë me dije mediet tej Adriatikut, i përzgjedhuri është Folarin Balogun.

Sulmuesi amerikan është ai që intrigon më shumë, teksa presidenti Zhang e konsideron më funksionalin për “Interin e tij të ri dhe të fortë”. Sado i kushtueshëm, investimi konsiderohet në perspektivë; në moshën 22 vjeçare, sulmuesi i Arsenalit është i shpejtë dhe teknik, i ndryshëm në karakteristika nga sulmuesit e tjerë në skuadër.

Ai mund të jetë garanci për të ardhmen. Kostoja e çmimit është sigurisht e lartë kur krahasohet me llogaritë e Interit, megjithatë ai ka avantazhin e një rroge më të ulët, në krahasim me Moratën. Operacioni vështirë se do të kushtojë më pak se 40 milionë euro.

22-vjeçari ka dalë nga moshat e Arsenalit dhe sezonin e fundit u huazua te Stade Reims në Ligue I të Francës, ku ia doli të luajë 37 ndeshje për të shënuar 21 gola dhe dhuruar 3 asiste; statistika këto që kanë bërë për vete Interin. Palët kanë nisur kontaktet.

S.DH/Shqiptarja.com

TAG:
• Inter
• serie a
• Folarin Balogun
• arsenal