268 mln euro dëm në buxhetin e shtetit/ KLSH: Shkeljet më të mëdha nga PPP-të dhe prokurimet

Rreth 268 milionë euro është dëmi i shkaktuar në buxhetin e shtetit nga administrata. Kontrolli i Lartë i Shtetit raporton se për afatin kohor 2016-2018 shkeljet financiare kanë qenë të mëdha dhe janë nxjerrë në pah nga 122 auditime të kryera për periudhën janar-shtator 2019.

KLSH e ka ndarë dëmin e konstatuar në dy pjesë, ku të parën e përbën ajo e parregullsive të konstatuara në të ardhura dhe shpenzime dhe të dytën shkelja e disiplinës financiare, që ka rezultuar me efekt negativ në performancë.

Sa i takon kategorisë së parë shkeljet më të shumta janë kryer në fushën e shitjes, blerjes dhe dhënies me qira të pasurisë shtetërore, ku nga keqadministrimi i pronës shtetërore të dhënë me qira dhe koncesionet i kanë shkaktuar buxhetit një dëm prej 20.6 miliardë lekësh.

Po ashtu nga prokurimet publike dhe gabimet e kryera nëpër procedura kanë shkaktuar një dëm në vlerën e 464.1 milionë lekëve.

Ndërkohë sa i takon kategorisë së dytë në fushën e të ardhurave shumica e shkeljeve janë konstatuar në sistemin tatimor me një dëm në buxhet prej 2.2 miliardë lekë.

Ndërsa sa i takon shpenzimeve 2.5 miliardë lekë dëm është shkaktuar nga shpenzimet operative dhe 2.3 miliardë nga procedurat e prokurimit.

Në këtë raport KLSH ka analizuar edhe disa nga institucionet kryesore dhe ka dhënë mesazhet përkatëse për institucionet e konstatuara në shkelje.

/b.ha./Shqiptarja.com

TAG:
• KLSH
• kontrolli i larte i shtetit