Tiranë, 28-vjeçarja pi helium dhe përfundon në spital! Babai denoncon: E bleu në tabakino! Shpallet në kërkim pronari i dyqanit

TIRANË- Pas oksidit të azotit që në masë rinia po e thith me tullumbace për të qeshurat që të shkakton, në Tiranë një vajzë ka përfunduar në spital pasi ka konsumuar helium, gazin që të gjithë e njohim për ndryshimin e timbrit të zërit.

Vajza 28-vjeçare bleu në një tabakino në afërsi të stadiumit “Air Albania” një bombol me helium, dhe pasi e kishte konsumuar, përfundoi në spital.  Rasti u denoncua në polici nga babai i vajzës, i cili mësoi për ngjarjen vetëm kur e bija u dërgua në spital.

Policia ushtroi kontroll në tabakinon e përshkruar në denoncim, e cila rezultoi në pronësi të një 23-vjeçari, të cilin autoritetet e shpallën në kërkim. Aty policia gjeti 2 bombola me lëndë kimike helium. Në gjendje të lirë por hetohet shitësi në tabakino, një 53-vjeçar.

Sa vjen e po bëhet edhe më problematike përdorimi në Shqipëri i gazeve të rrezikshme për shëndetin që po u ofrohen të rinjve si modë.

Pasojat e thithjes së heliumit? 

Thithja e tepërt dhe pakontrolluar e heliumit mund të shkaktojë probleme të përhershme shëndetësore apo edhe vdekje. Simptomat: Dhimbje koke, çorientim dhe humbje e vetëdijes. Ngufatja që rezulton se vështirë vihet re kur konsumohet në mënyrë të tepruar, gjë që e rrit shumëfish rrezikun.

M.Q./SI.E./Shqiptarja.com

TAG:
• tollumbace me azot
• Tirane
• tabakino
• policia e tiranes