Në ditën e 28-vjetorit të vrasjes nga mafia të gjyqtarit italian Paolo Borsellino, presidenti i Shqipërisë, Ilir Meta, e ka kujtuar me një citim të fjalëve të tij. Meta sjell një pasazh të fjalëve që Borsellino tha në funeralin e prokurorit Giovani Falcone, gjithashtu të vrarë nga mafia, dhe thotë se kjo është arsyeja përsa ai është i pavdekshëm.

"Në funeralin e Giovanni Falcones, Paolo Borsellino iu drejtua prokurorëve më të rinj: "Unë e di se kush do të jetë i vdekuri i radhës, por unë i kam dhënë fjalën Falcones. Lum ata njerëz që luftojnë për ide të cilat më pas ecin me këmbët e të tjerëve". Ja përse Borsellino është i pavdekshëm!"-shkruan Meta.

Edhe ambasadori i BE-së Luigi Soreca kujton vrasjen e gjyqtarit me një postim në rrjetet sociale. “Çdo 19 korrik, mendja jonë kujton ato momente të tmerrshme të 28 viteve më parë, kur mafia vrau Paolo Borsellinon dhe 5 oficerë policie. Por fjalët e tij vazhdojnë të jenë me ne, për të kujtuar se lufta për një botë më të mirë është një detyrim moral për të gjithë ne. Faleminderit përgjithmonë”.

Giovani Falcone dhe Paolo Borsellino, prokuror dhe gjykatës, janë dy nga njerëzit që luftuan me jetë kundër mafias në Itali në vitet 1990. Të dy ishin të lindur në Siçili dhe u përpoqën që të vinin rregull në këtë rajon, duke nxjerrë para drejtësisë njerëz që bënë krime makabre në atë kohë.