POP 5

Lajmet më të lexuara të 5 minutave të fundit

Sociale

34 mijë të divorcuar/ 47-vjeçarja për Report Tv: U ndava prej dhunës, kam punuar 3 punë për të rritur djalin! Ish-bashkëshorti s’paguan detyrimet

Mbi 34 mijë persona të divorcuar raportoi INSTAT në censin e fundit, ndërsa më shumë se gjysma e tyre janë 40 deri 50 vjeç. Report Tv sjell historinë e një gruaje të divorcuar në moshën 40-vjeç, e cila rrëfen kalvarin e vuajtjeve gjatë dhe pas martesës.

Mimoza, është vetëm një nga vajzat dhe gratë e shumta që kanë rënë pre e dhunës në familje.

47-vjeçarja pas 11 vitesh martesë vendosi t’i drejtohet dyerve të gjykatës për tu divorcuar, për shkak të dhunës së vazhdueshme psikologjike dhe fizike nga ish-bashkëshorti i saj.

“Vendosa të divorcohem pas 11 vitesh martesë. Shkaku ishte dhuna fizike e psikologjike në mënyrë të vazhdueshme.”

Krisjet e para mes çiftit nisën që në 5 vjetorin e parë të martesës tregon Mimoza, kohë në të cilën ish-bashkëshorti i saj filloi alkoolin dhe bixhozin.

“Mospërgjegjshmëria për t’iu përgjigjur familjes, nuk sillte të ardhurat në shtëpi, krijonte debate nga hiçi. Lekët i çonte nëpër lokale, nëpër lloto, ku tjetër.”

Aktualisht Mimoza punon në kryeqytet dhe të ardhurat e saj mujore janë vetëm 35 mijë lekë, me këto të ardhura duhet të mbaj veten edhe djalin, pasi që pas divorcit ish-bashkëshorti nuk ka paguar as detyrimin ushqimor. Më herët ajo tregon se e detyruar ka bërë deri në tre punë për të rritur djalin.

“150 mijë lekë të vjetra, që këto vite nuk i ka paguar, edhe tani që çështja ka kaluar në zyrat e përmbarimit është ndërprerë ka shumë për të paguar. Kam punuar me 2-3 punë, që fëmijës tim mos ti mungonte asgjë. Kam pasur të afërmit e mi pranë, dhe ia kam dal”

Si rasti i Mimozës janë mijëra të tjera në Shqipëri.

Mbi 34 mijë persona në Shqipëri janë të divorcuar dhe sipas të dhënave të publikuara nga Censi, grupmosha 40-50 vjeç përbën numrin më të lartë të çifteve që i kanë dhënë fund martesës.

Sipas ekspertëve krahas faktorëve ekonomik, numri i divorceve në rritje në vend ka ardhur edhe si pasojë e martesave të hershme shpeshherë të nxituara nga të rinjtë.

“Në moshën 40-50 vjeçare sigurisht ka ca faktorë të tjera. Një divorc mund të ketë një arsye që ka një lloj adoleshence të vonuar të kësaj moshe. Dmth, fillojnë e mendojnë për partnerë/e tjetër si rezultat i njohjeve në ambientet e përbashkëta të punës, njohjeve rastësore sidomos gjatë pushimeve verore, ndodh shumë kjo gjë dhe është edhe më e pranishme. Në këtë moshë ka një pjesë të madhe të burrave që janë parazit, pa punë. Të dhënë pas veseve të drogës, alkoolit, jetës së shthurur, mungesës së përgjegjësisë prindërore, të cilat bëhen të padurueshme për femrat”, shprehet sociologu Gëzim Tushe.

“Shkaqet e grindjeve të vazhdueshme, ekonomike, dhuna në familje, janë të detyruar ti drejtohen avokatit për zgjidhjen e martesës. Nuk është konflikt i momentit, por një martesë që mund të ketë vite të tëra që ka pasur krisje”, thotë avokati Alban Duro.

Gjithmonë në një divorc, fëmijët janë ata që vuajnë më shumë pasojat.

“Është për ardhur keq që shumica e çifteve të divorcuar, shumë prej tyre, kryesisht bashkëshortët nuk duan që të përgjigjen për fëmijët e tyre duke paguar detyrimin ushqimorë, dhe kjo për shkak se nuk e presin mirë martesën me ish-bashkëshorten edhe ato që e pësojnë janë fëmijët e tyre. Rreth 80% e prindërve nuk paguajnë në kohë detyrimin ushqimor, mundohen të paraqesin në gjykatë fakte për të ulur orët e punës për të ardhurat që ata kanë, etj”, u shpreh Duro.

“Nga divorci nuk ndahet vetëm një çift, por mbeten fëmijët rrugëve dhe gratë me të ardhura të pamjaftueshme, bien në varfëri. Ne si shoqëri nuk i bëjmë divorcet miqësore, por konfliktuale. Nuk bëhet fjalë për ribashkim martesor, por as për të mbajtur përgjegjësit prindërore”, vijon Tushe.

Të dhënat tregojnë se Shqipëria vijon të ketë numrin më të lartë të divorceve në rajon, dhe sipas sociologëve përveç probleme të thella sociale përkthehet edhe si një shoqëri në emancipim e sipër, ku çiftet i gjejnë rrugëzgjidhjen e duhur një martese e cila nuk funksionon.

SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    20 Nëntor, 13:18

    Vrasja e 14 vjeçarit, çfarë duhet të bëjë Shqipëria me TikTok e Snap Chat?

Lajme të tjera



×

Lajmi i fundit

Kreshnik Spahiu: Pse Strasburgu po e zhgënjen shumë keq Partinë Demokratike?

Kreshnik Spahiu: Pse Strasburgu po e zhgënjen shumë keq Partinë Demokratike?

23 Nëntor, 23:55 nga Kreshnik Spahiu