E bën më të veçantë këtë festival prania e gazetares dhe shkrimtares së njohur italiane Daria Bignardit, Andrej Nikolaidhis dhe shkrimtarit të njohur spanjoll, me origjinë baske, Kirmen Uribe. Gjithashtu, talentet e reja të Liceut Artistik dhe të shkollave të kryeqytetit ishin protagonistë dhe vizitorë njëherësh të këtij festivali. Festivali pati promovime dhe perfomanca artistike interesante. Shtëpia botuese “Toena” ka bërë promovimin e romanit “Bilbao, Nju Jork, Bilbao”, të shkrimtarit spanjoll Kirmen Uribe, në bashkëpunim me Ambasadën Spanjolle, ku ka surprizuar me pjesëmarrjen e tij kryeministri Edi Rama. AkademikU Rexhep Qosja ka promovuar në Muzeun Historik Kombëtar vëllimin e parë të ditarëve të tij që mbulojnë periudhën 1966 - 2014. “Shpresoj që ditari im të sjellë një përvojë politike, shoqërore, morale, e cila mund t’i shërbejë historisë, përvojës sonë të përgjithshme morale kombëtare”, është shprehur gjatë promovimit Qosja.
Shtëpia botuese “Dudaj” ka organizuar konferencën me temë “Letërsia e angazhuar dhe gruaja” me panel ministren e Kulturës, Mirela Kumbaro, gazetaren Rudina Xhunga, shkrimtaren Daria Bignardi, Eda Derhemin dhe Ardian Vehbiun. Koncepti i letërsisë së angazhuar nuk duhet të jetë vetëm i femrave”, ka thënë Kumbaro gjatë këtij promovimi. Nuk kanë munguar as aktivitetet e veçanta në artet pamore. Në Festivalin e Librit dhe të Artit është prezantuar artisti Nusret Gjokoviq me kurator Edison Çerajn. Ndërsa për fëmijët, në oborrin e brendshëm të Muzeut Kombëtar është shfaqur “Çufo”, që ka shtuar larminë e aktiviteteve, por edhe pjesëmarrësve. Festivali i Librit dhe Artit ka përfunduar me dy çmime për veprat kushtuar diktaturës komuniste. Libri “Sende që nxirrte deti” i autorit Ardian Vehbiu ka fituar çmimin “Ardian Klosi”.
Libri i Ardian Vehbiut është një ese e çlirët për historinë e dashurisë së shqiptarëve, ose më mirë të shumë prej nesh, me Perëndimin gjatë viteve të diktaturës komuniste dhe izolimit të vendit. Çmimi i dytë që u dedikohej arteve pamore i pagëzuar me emrin “Danish Jukniu” i është dhënë Video-instalacionit “Never” (ENVER) të Armando Lulajt. I sjellë nga galeria “TICA”, me kuratore Sonja Lau, vepra huazon një auto-homazh, pothuaj monumental të diktatorit Enver Hoxha, si pikënisje për një ridedikim konfliktual. Artisti Lulaj rishkruan shkronjat e venitura të parrullave, por me një ndryshim të dallueshëm: Enver shndërrohet në “Never”. Ministrja e Kulturës Kumbaro është shprehur se ky festival trazoi për mirë jetën e kryeqytetit në këtë fund prilli. Sipas saj “indiferenca ndaj ngjarjes kulturore do të ishte shqetësuese për një shoqëri”. Festivali i Librit dhe i Artit organizohet për herë të parë në Shqipëri.
Ministrai e kulturës i ka dhënë mbështetjen duke e afirmuar si një aktivitet me përmasa të mëdha që përfshin dy fusha tejet të rëndësishme të kulturës: artet pamore dhe botimet shqiptare. Ativiteti u organizua nga Shoqëria e Librit Shqip, që nisi të ekzistojë dy vjet më parë, nën drejtimin e të ndjerit e të mirënjohurit Ardian Klosi, me pjesëmarrjen e disa prej botuesve më seriozë shqiptarë: shtëpia botuese "Toena", Instituti i dialogut dhe Komunikimit, "Skandërbeg Books", "Omsca", "Kuteli", botimet "Dudaj", "Botart".
Shkrimi u publikua sot 29 prill 2014 në gazetën Shqiptarja.com (print)
Redaksia online
(d.a/shqiptarja.com)
![](https://www.shqiptarja.com/template/img/sh_logo1.png)