8 Prilli-Dita Ndërkombëtare e Romëve

TIRANË-8 Prilli, njihet ndryshe si Dita Ndërkombëtare e Romëve.
Në 8 Prill të vitit 1971 në Londër u organizua konferenca ndërkombëtare ku u vendos që data 8 Prilli të jetë, "Dita Ndërkombëtare e Romëve".
Aty u vendos edhe për flamurin dhe himnin Rom "Gelem Gelem" që së bashku me gjuhën rome i bëjnë romet një minoritet qartësisht të dallueshëm për nga vlerat e tyre të pasura etno-kulturore.
Në korrik të 2008, Shqipëria u anëtarësua në "Dekadën e Përfshirjes së Romëve", e cila synon përmirësimin e gjendjes social-ekonomike për minoritetin rom në Shqipëri. Romët kanë mbërritur nga India në Ballkan, në Shqipëri rreth 6 shekuj më parë, për t'u përhapur më vonë në Evropë.
Deri një vit më parë, në Shqipëri besohej se romet varionin nga 80-150 mijë vetë, por me CENSUS-in e fundit, ata deklarohen të jenë më të paktë se kaq në numër. Kjo ditë për romet vjen si një apel për më shumë të drejta dhe vëmendje nga shteti e shoqëria për integrimin e tyre në jetën sociale ekonomike të vendit, mundësinë për punësim, strehim e arsimim për t'i dhëne fund varfërisë që i karakterizon.
Mesazhi i kësaj dite kudo ku romet ndodhen është "Paqe dhe zhvillim për të gjithë romët në një botë pa diskriminim e racizëm"./ATSH/