​Apeli i nënës së Bleona Matajt:
A është vajza ime në këto foto?

Nëna e Bleona Matajt kërkon ndihmën e institucioneve dhe të publikut për identifikimin e disa fotove ku pretendohet se është vajza e saj e zhdukur 6 vite më parë.

Bukurie Veizi deklaron se një emigrant shqiptar në Londër i ka pohuar se e ka parë vajzën dhe i ka dërguar asaj foto nëpërmjet Skype-t. Veizi shprehet se në foto është pikërisht vajza e saj Bleona, edhe pse e sigurt plotësisht do të ishte vetëm nëse do ta kishte përballë.

Vendndodhja e fundit e Bleonës, sipas versionit të Bukurie Veizit është Londra. Sipas informacioneve që i ka dhënë emigranti nga Londra, nëna e Bleona Matajt pohon se fillimisht vajza ka qenë në Shqipëri, për të kaluar më pas në Greqi e prej andej në Maqedoni, ku është mbajtur nga një shtetas maqedonas.

Ky i fundit, sipas Bukurie Veizit, është edhe personi që e mban aktualisht në Londër, Bleonën dhe i ndryshon vendndodhjen herë pas here për të mos u gjetur nga policia. Më tej nëna e Bleonës deklaron se nga ana e shtetasit maqedonas ka pasur edhe një kërkesë për para në këmbim të dorëzimit të vajzës.

Sipas saj, maqedonasi që mban aktualisht Bleonën në Londër ka kërkuar 20 mijë euro që t'i kthejë vajzën. Për këtë rast ajo shprehet se ka vënë në dijeni edhe Policinë dhe Prokurorinë e Krimeve të Rënda.

Por nga ana tjetër, si Policia e Shtetit ashtu edhe Prokuroria e Krimeve të Rënda, të kontaktuar nga Report TV kanë mohuar që të kenë pasur prova të reja nga ana e nënës së Bleonës, si deklarime apo edhe fotot, të cilat po publikohen sot.

Tashmë mbetet vetëm që organet kompetente të verifikojnë këto foto nëse vajza në to është Bleona Mata. Si dhe informacionet më të fundit për vendodhjen e Bleona Matës në Londër.







Redaksia Online
(u.s/shqiptarja.com)