​Një taksist në Tiranë fans i Donald
Trump, po bën namin me klientë

Një mënyrë për të rënë në sy dhe për të tërhequr klientë, apo dicka tjetër? Uljan Kolgjegja, një taksist në Tiranë ka veshur makinën me tapiceri ku është stampuar fytyra e Donald Trump. Por gjërat janë më shumë se kaq.

Sepse Kolgjegja shprehet se ka ndërmarrë këtë veprim pas deklaratës së kryeministrit Edi Rama që ka fyer kandidatin republikan për Shtëpinë e Bardhë në SHBA.

Rama tha se, «Nëse Trump zgjidhet President i SHBA, është shumë real rrezikimi i raportit Shqipëri-Amerikë”.

Por idea e taksistit që nisi më shumë si inat ndaj kryeministrit të vendit të tij tërhoqi aq shumë klientë, sa ai nuk i kishte parë kurrë këto 13 vitet e fundit. Sipas Kolgjegja, Trump mund të zgjojë shpresa të reja për botën nëse do të zgjidhet President.

Skeptik tregohet sa i përket Hillary Clinton, kandidates demokrate për Shtëpinë e Bardhë në SHBA.

 «Shih botën sot, botën e Clinton e Obamas, plot me luftra...Nuk kanë bërë mjaftueshëm”, tha Kolgjegja, ndërkohë që shton se Trump, “përfaqëson ndryshimin”.

Por edhe pse Trump ka fituar zemrën e një shqiptari në Tiranë, ai pak orë më parë doli humbës në debatin përballë kandidates demokrate, Hillary Clinton.

Nuk e dimë sesi ndihet Kolgjegja për këtyë disfatë të parë të Trump, por mund të ngushëllohet me ndonjë personazh të ri.
Taksisti është një personazh i njohur në Tiranë sa i përket pasionit të tij për tatuazhet. Ai njihet për tatuazhin e famshëm me fytyrën e Sali Berishës në gjoks, si dhe për vizatimin e imazhit të moderatores Marina Vjollca në krah.  









(d.b/Shqiptarja.com)