​Për ata që hanë ushqim natën. Ja
nga cilat sëmundje rrezikoheni

Ka persona të cilët kanë zakon të ngrihen natën dhe të konsumojnë ushqim, por ky nuk është një zakon i mirë, pasi në një kohë kur organizmit i duhet të pushojë, nxitet që të punojë.
 
Është e vërtetuar se të ngrënit ushqim natën, nxit shtimin në peshë, por një studim i bërë kohët e fundit raporton se personat që ushqehen natën janë më të prirur të preken nga diabeti dhe sëmundjet e zemrës.

Disa studiues amerikanë të Shkollës Mjeksore Perelman në Universitetin e Pensilvanisë, gjatë kërkimeve të tyre disavjeçare arritën të nxjerrin në pah se ushqyerja natën rrit nivelet e sheqerit në gjak, dhe nxit prekjen nga diabeti.
 
Gjithashtu rritet edhe niveli i kolesterolit dhe triglicerideve, që rrisin shancet për prekjen nga sëmundjet e zemrës.
 
Ky grup shkencëtarësh bëri një eksperiment tek të rinjtë dhe doli me përfundimin se ushqyerja pas orës 11 të natës shkakton shtim në peshë pasi ngadalësohet procesi i përpunimit të yndyrës, procesi ku yndyrat zbërthehen dhe përdoren për energji. Në këtë rast trupi përpunonte më pak lipide ose yndyra.
 
Autorja kryesore e studimit, profesoresha Kelly Allison, shprehet se: “Edhe pse ndryshimi i mënyrës së jetesës nuk është kurrë i lehtë, këto rezultate sugjerojnë se ngrënia herët mund të jetë një përpjekje e vlefshme për të parandaluar këto sëmundje kronike. Kemi mjaftueshëm njohuri mbi ndikimin e tejngopjes në shëndet dhe shtimin në peshë, por tani mund të kuptojmë më mirë mbi mënyrën se si trupi i përpunon ushqimet në momente të ndryshme të ditës për një periudhë afatgjate”.
 
Ekspertët e zemrës rekomandojnë që të mos hani asgjë dy orëve para se të shkoni për të fjetur.
 
Redaksia Online
Er.K/Shqiptarja.com