Një rregull kundër vapës në tenis. Pas polemikave të sezonit të kaluar, ATP (Shoqata e Profesionistëve të Tenisit) prezantoi një rregull për vitin 2026 që mund të çojë në pezullimin e ndeshjeve nëse temperatura, lagështia dhe era tejkalojnë kufijtë e përcaktuar.

Shoqata e lojtarëve profesionistë të tenisit ka njoftuar futjen e një protokolli për vapën ekstreme. "A doni që një lojtar të vdes në fushë?", pyeti tenisti danez Holger Rune në tetor, duke garuar në turneun e Shangait, ku temperaturat tejkaluan 30 gradë Celsius me nivele lagështie mbi 80%.

Tani, "për të forcuar mbrojtjen e lojtarëve që garojnë në kushte ekstreme", një garues do të jetë në gjendje të kërkojë një pushim dhjetë minutësh gjatë setit të tretë për t'u freskuar nëse indeksi WBGT, i cili merr parasysh temperaturën, lagështinë dhe erën, arrin 30.1 °C gjatë dy seteve të para, sipas ATP.

Ndeshja do të pezullohet nëse ky indeks tejkalon 32.2 °C. Rregulli i ri, thekson ATP, synon të "mbrojë shëndetin e lojtarëve", por edhe të "përmirësojë kushtet për spektatorët, gjyqtarët, djemtë e topit dhe ekipin organizator të turneut".

Deri më tani, vendimet në lidhje me kushtet e lojës që lidhen me motin, veçanërisht nxehtësinë, ishin përgjegjësi e mbikëqyrësit të turneut, në konsultim me ekipet mjekësore dhe organizatorët vendas. Sezoni i ATP 2026 fillon më 2 janar në Australi me Kupën e Bashkuar (një turne i ekipeve kombëtare).