A lindi vërtet Jezusi më 25 Dhjetor?

Çështja e datës së saktë të lindjes së Jezu Krishtit, është debatuar për shekuj me radhë. Ka nga ata që shqetësohen se 25 dhjetori mund të mos jetë koha e duhur për të festuar lindjen e njeriut që e ndryshoi historinë e botës. Ndërkohë prift i shquar ortodoks grek, Panajotis Papageorgiu, që shërben në Kishën Ortodokse Greke të Përfytyrimit të Shenjtë në Gjeorgji, pranon se ka një kontradiktë në caktimin e Krishtlindjes më datën 25 dhjetor.

Ai citon Ungjilli i Lukës që thotë se “në atë rajon kishte barinj në fushë, që ruanin kopenë e tyre natën”. Argumenti është se dhjetori, ishte një muaj shumë i ftohtë, ndaj barinjtë nuk mund të ishin në fushë duke ruajtur kopetë e tyre! Prandaj, ithtarët e kësaj teorie pohojnë se Jezusi duhet të ketë lindur në pranverë.

“Barinjtë qëndronin kryesisht në kullota verore, dhe i zhvendosnin bagëtitë në shpellat e zonës gjatë stinës së dimrit. Delet nuk kullosnin në fushë natën. Barinjtë vetëm sa i ruanin kopetë e tyre; ndoshta me turne gjatë natës, pasi delet qëndronin në vatrat e zjarrit të ndezura në shpellat aty pranë”- shpjegon Papageorgiu.

LEXO EDHE:
Report Tv reportazh në Hajmel/ 250 banorë vendosin në skenë ‘Betlehemi i gjallë’, shfaqje e mahnitshme e ritualit të Krishtlindjes

Ai shton se ndonëse moti në atë pjesë të botës mund të jetë i ftohtë në dhjetor, temperaturat mund të jenë gjithsesi mjaftueshëm të larta që barinjtë të vazhdojnë t’i nxjerrin kopetë e tyre gjatë ditës, dhe t’i kthejnë brenda shpellave gjatë natës, ku është shumë më ngrohtë se sa në stanet e tyre verore, një praktikë kjo që është e përhapur ende sot në disa vende në Lindjen e Mesme.

Një tjetër element, që përmendet shpesh nga ata që tallen me kremtimin e Krishtlindjeve, ishte se paganët e lashtë kremtonin në këtë datën një festë për ndër të Saturnus, perëndisë së bujqësisë, që sipas kalendarit romak përkonte me Solsticin Dimëror.

“Është e vërtetë që shumë festa pagane u kristianizuan gjatë shekullit IV e tutje, dhe kjo e bën këtë një pretendim të arsyeshëm. Megjithatë, kjo nuk është provë përfundimtare se lindja e Krishtit nuk ka ndodhur në një nga ditët e dhjetorit, edhe nëse nuk ka qenë saktësisht më 25 dhjetor. Madje dhe edhe nëse të krishterët e kanë vendosur qëllimisht lindjen e Krishtit në ditën e festës pagane”-thekson thotë Papageorgiu.

Festa e Krishtlindjeve, u kremtua për herë të parë në fillim të shekullit IV, fillimisht në Romë (në vitin 336 Pas Krishtit) dhe më pas në pjesët lindore të Perandorisë nga fundi i atij shekulli, ku gjejmë një predikim nga Shën Gjon Gojarti, i cili shpjegon pse festimi i Krishtlindjeve ndodh në dhjetor dhe saktësisht në datën 25 dhjetor, duke ofruar prova historike nga ngjarjet e Dhiatës së Re.

Shën Krizostomi, duke predikuar në fundin e shekullit IV në Antioki, vetëm 10 vjet pas kremtimit të parë së festës së Krishtlindjes në Lindje, ofron një shpjegim mbi zgjedhjen e kësaj date. Ai thekson se vendimtare është koha e regjistrimit të popullsisë, siç përmendet tek Luka 2:1-7.

“Ai ishte regjistrimi i parë i popullsisë, që ndodhi që kur Kuirinius ishte caktuar guvernator i provincës romake të Sirisë. Cilido që dëshiron të dijë kohën e saktë të censusit mund të kërkojë lirisht kodikët e lashtë, të cilët ruhen në bibliotekat publike të Romës”- thekson ai.

Ungjilli i Lukës 1:8-15 tregon se Zakaria hyri në tempull për t’u falur, ku pa vegimin e një engjëlli të Zotit, i cili e njoftoi për lindjen e djalit të tij, të cilin ai do ta quante Gjon. “Menjëherë pas atij momenti, gruaja e tij Elizabeta mbeti shtatzënë”- shpjegon Papageorgiu. Dhe Krizostomi vë në dukje se 6 muaj më vonë, engjëlli Gabriel iu shfaq Virgjëreshës Mari dhe i thotë asaj do të lindë Birin e Perëndisë, teksa i zbulon se kushërira e saj Elizabeta ishte tashmë në muajin e gjashtë të shtatzënisë (Luka 1:30-37).

“Kjo do të thotë se se Elizabeta mbeti shtatzënë (me djalin e saj Gjon Pagëzorin) në fundin e muajit shtatorit, pas festës së Tabernakujve, ndërsa Maria 6 muaj më vonë në fundin e muajit të mars. Nëse numërojmë 9 muaj nga ajo kohë, atëherë mbërrijmë në fundin e dhjetorit, që është koha kur lindi Jezusi. Prandaj është i justifikuar festimi i Krishtlindjeve më 25 dhjetor”- thekson Papageorgiu për “Greek Reporter’. Natyrisht, është e pamundur të dihet dita e saktë kur lindi Krishti, megjithatë besimi i krishterë nuk varet nga saktësia e kësaj date. / GreekReporter – Bota.al

K.T./Shqiptarja.com

TAG:
• krishtlindje
• Jesusi