Përplasja me kryebashkiaken e Shkodrës, Ndreu për Report Tv: Ademi nuk mund të deligjitimojë kryetarët e bashkive! Pretendimi se po ndërhyhet në Kushtetuese, fantazi e saj

Kryetarja e bashkisë së Shkodrës, Voltana Ademi nuk mund të deligjitmojë kryetarët e bashkive dhe se Shoqata e Bashkive nuk është pronë e saj. Kështu ka deklaruar në një intervistë për Report Tv kryetari i bashkisë së Lezhës, Pjerin Ndreu, teksa u përgjigj në lidhje me padinë që Ademi ka ngritur kundër tij duke kërkuar që vendimi për zgjedhjen në krye të Shoqatës së Bashkive të shpallet i paligjshëm. Ndreu i nënvizoi se ky është handikapi më i madh që thuhet sot nga një zyrtar.

‘Është një Shoqatë ku është vetëm ajo sipas logjikës së saj të tjerët nuk ekzistojnë dhe ekziston vetëm ajo. Ky është handikapi më i madh që thuhet sot nga një zyrtar. Është shoqatë e Bashkisë dhe kanë aderuar me vendime të Këshillave Bashkiake. Kryetarët e Këshillave janë anëtarë të asamblesë së Shoqatës. Shoqata është një organizim i bashkive, jo pronë e Ademit dhe as e imja dhe ne si anëtar të asamblesë kemi thirrur asamblenë dhe ishte e ftuar, ajo e ka uzurpuar. Ademi nuk mund të deligjitimojë kryetarët e bashkisë.’- tha Ndreu.

Ndreu thotë se, argumenti që përdor Ademi se ai ka për qëllim ndërhyrjen e paligjshme në procesin që zhvillohet në Gjykatën Kushtetuese, e cila do të shqyrtojë kërkesën me datë 23 qershor 2021, është një fantazi e saj. Sipas Ndreut, Gjykata Kushtetuese është një institucion serioz dhe nuk merr vendime me humorin e Ademit.

‘Kjo është një fantazi e znj.Ademi. Gjykata Kushtetuese është një institucion serioz dhe nuk merr vendime me humorin e Ademit, që këtu ka një handikap njerëzor. Për ne është opsion organizimi i Shoqatës dhe kemi bërë çdo gjë në përputhje me statutin. E inkurajoj të vazhdojë protagonizmin e vet politik, por nuk ka asnjë të drejtë. ‘- tha Ndreu.

Sa i takon mungesës së rojeve të plazhit në zonat bregdetare, Ndreu tha se aktualisht nuk dhënia e hapësirave publike në plazhe nuk ka filluar ende. Sipas Ndreut me dhënien e hapësirave publike, operatorët turistikë janë të detyruar që të ngrenë edhe kullat e vrojtimit si dhe të koshave të mbeturinave.

‘Dhënia e hapësirave publike nuk ka filluar ende. Me dhënien e hapësirave publike operatorët turistikë janë të detyruar se bashkë me shezllonët janë të detyruar që të ngrenë edhe kullat e vrojtimit si dhe të koshave të mbeturinave. Me t’u dhënë hapësirat publike ato kanë detyrimin sipas rregullave që t’i ngrenë.’- tha Ndreu.

M.Q./Shqiptarja.com

TAG:
• pjerin ndreu
• voltana ademi
• Lezhe