Afron vizita e Papa
Françeskut në Shqipëri

TIRANE- Ndërkohë që puna me përgatitjet për rregullimin e Tiranës dhe organizmin e pritjen e Papa Françeskut në Shqipëri më 21 shtator po vazhdon me intensitet, fondet e lëna në dispozicion nuk kanë mjaftuar. Kështu që qeveria ka dhënë dje një shtesë fondesh prej 29 400 000 (njëzet e nëntë milionë e katërqind mijë) në buxhetin e vitit 2014, miratuar për ministrinë e kulturës, për përballimin e shpenzimeve, në kuadër të organizimit të punëve në vijim të ardhjes së Papa Françeskut në Shqipëri.

Vendimi sipas deklaratës zyrtare është bërë në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 13, të ligjit nr.185/2013. Në këtë vendim thuhet se  “Ministrisë së Kulturës, në buxhetin e miratuar për vitin 2014, t’i shtohet fondi prej 29 400 000 (njëzet e nëntë milionë e katërqind mijë) lekësh, i ndarë, si më poshtë vijon: a) 8 748 128 (tetë milionë e shtatëqind e dyzet e tetë mijë e njëqind e njëzet e tetë) lekë, për mbulimin e shpenzimeve të shtesës së punimeve në zbatim të projektit

“Për ndërhyrje rehabilituese në sheshin “Nënë Tereza”; 10 578 262 (dhjetë milionë e pesëqind e shtatëdhjetë e tetë mijë e dyqind e gjashtëdhjetë e dy) lekë, për mbulimin e shpenzimeve për shtesë fondi në zbatim të projektit “Për realizimin e dekorit të qytetit të Tiranës në kuadër të vizitës së Papa Françeskut në Shqipëri” si dhe aspektet organizative e protokollare të ceremonialit të vizitës së Papa Franceskut; 1 673 610 (një milion e gjashtëqind e shtatëdhjetë e tre mijë e gjashtëqind e dhjetë) lekë, për mbulimin e shpenzimeve “Për realizimin e altarit të meshës që do të mbajë Papa Françesku”; 8 400 000 lekë (tetë milionë e katërqind mijë) lekë, për mbulimin e shpenzimeve që do të kryhen për realizimin ekspozitës në Muzeun Historik Kombëtar, në kuadër të ardhjes në Shqipëri të Papa Françeskut. 


Shkrimi u botua në Shqiptarja.com (print) në 11 Shtator 2014

Redaksia Online
(d.a/shqiptarja.com)