Një aksident i pazakontë ka ndodhur në orët e para të mëngjesit të së enjtes, rreth orës 04:30, në aksin rrugor Vlorë–Orikum, në vendin e quajtur Radhimë.

Sipas policisë, një automjet tip “Volkswagen” me targa AB087LB, që drejtohej nga shtetasi G.D., është përplasur me katër kuaj që ndodheshin në mes të rrugës. Si pasojë e goditjes së fortë, të katër kafshët kanë ngordhur në vend.

Nga të dhënat paraprake, dyshohet se automjeti po lëvizte me shpejtësi mbi normat e lejuara në momentin e përplasjes. Ndërkohë, testi i alkoolit i kryer ndaj drejtuesit të mjetit rezultoi negativ (0.00 mg/l).

Grupi hetimor po punon për të përcaktuar shkaqet e plota të aksidentit dhe rrethanat në të cilat ndodhi ngjarja.