Akt terrorist në Prishtinë, kapet 
serbi me 12 kg lëndë eksplozive 

PRISHTINE – Një sulm terrorist me pasoja që mund të ishin fatale në jetë njerëzish, është parandaluar nga Policia e Kosovës  mbrëmjen e së enjtes, ditë kur në të gjithë botën u kremtuan Krishtlindjet. Pas informacioneve të marra nga Agjencia Inteligjente, Policia e Kosovës mundi të arrestojë 46-vjeçarin serb Slobodan Gavriç ku në automjetin e tij tip Reno Clio me targa të Beogradit u gjetën 12 kilogramë lëndë eksplozive. Burime nga Policia e Kosovës thanë për Shqiptarja.com se deri më tani, plani që dyshohet të ketë pasur serbi ishte të vinte eksplozivin në “Hotel Grand” në Prishtinë, në të cilin Gavriç ishte akomoduar dy ditë më parë. Pasi kishte prenotuar dhomën në këtë hotel, 46-vjeçari ishte larguar në Serbi për t’u rikthyer sërish, prej nga ku policia dyshon se është marrë edhe lënda eksplozive. Ai ka ardhur nga Veriu i Kosovës dhe ka hyrë në Kosovë përmes pikës doganore pa u vënë re. Një tjetër detaj është një hartë e gjetur në hotel që do t’i shërbente atij të arratisej më lehtë pasi të kryente sulmin në natën e dytë të Krishtlindjes.  Po ashtu brenda makinës së tij ishin të vendosur copa metalike, që rritin fragmentimin dhe shkaktojnë dëme të mëdha në njerëz.

Policia e Kosovës në orën 21:00 ka mundur ta arrestojë në automjetin e tij në lagjen “Arbëria”, zonë ku dhe ndodhen selitë e ambasadave. Burime nga Policia e Kosovës, sqaruan për Shqiptarja.com se arrestimi i serbit pranë selive diplomatike është krejt i rastësishëm dhe se akti terrorist nuk ka pasur objektiv ambasadat, pasi makina ishte në lëvizje teksa është ndaluar nga një patrullë e Policisë së Kosovës. Po ashtu, të njëjtat burime përjashtojnë një tjetër pistë, atë të shpërthimit të mundshëm në Katedralen e Prishtinës.
 
Edhe pse zyrtarisht nga policia nuk bëhet i ditur se për çfarë lloj materiali eksploziv bëhet fjalë, ajo që është e qartë sipas tyre, është fakti se pas përgatitjes kjo lëndë eksplozive do të hidhej në erë me telekomandë për sulm terrorist.

I arrestuari Slobodan Gavriç është veterinar nga Rashka dhe aktualisht po mbahet në paraburgim nga policia e Kosovës. 

Ja kush është serbi e plani i tij për të shpërthyer eksplozivin
  



Tentativa terroriste ka aktivizuar menjëherë mekanizmat qeveritarë e ata të sigurisë në vend. Presidentja e Republikës së Kosovës, Atifete Jahjaga ka takuar kryeministrin Isa Mustafa dhe krerët e mekanizmave të sigurisë: drejtorin e Policisë së Kosovës, Shpend Maxhunin dhe drejtorin e Agjencisë së Kosovës për Inteligjencë, Bashkim Smakaj të cilët diskutuan për rritjen e masave të sigurisë dhe kërkuan bashkëpunim nga shtetet fqinje për zbardhejn e plotë të ngjarjes. Jahjaga: Serbia të ndihmojë për hetimin

Një reagim ka ardhur nga qeveria e Kosovës e cila dënoi tentativën terroriste me anë të një njoftimi në faqen e saj zyrtare.Qeveria e Kosovës dënon aktin terrorist

I menjëhershëm ka qenë edhe reagimi i ministrit të Brendshëm kosovar, Skënder Hyseni i cili tha se shtetasi serb kishte synime të qarta terroriste dhe nëse sasia e eksplozivit do të kishte shpërthyer, pasojat do të ishin të tmerrshme. Hyseni: Nëse eksplozivi do shpërthente pasojat do ishin tmerruese

Ndërsa homologu serb i këtij të fundit, Nebojsha Stefanoviç bëri të ditur se është bastisur shtëpia e 46-vjeçarit Gavriç në Rashkë dhe u tregua i gatshëm për të bashkëpunuar me EULEX-in kosovar.
 
Zëdhënësi i Policisë së Kosovës: Ndaluam serbin pas informacioneve nga Agjencitë Inteligjente
Zëdhënësi i Policisë së Kosovës, Baki Kelani, deklaroi se ndaj serbit është caktuar masa e ndalimit policor 48 orë deri në një vendim tjetër të organeve të drejtësisë. Ai ka thënë se policia nga ana e saj kishte informacione paraprake për këtë automjet, çka është finalizuar me ndalimin e saj.
“Policia ka pasur informacione paraprake të inteligjencës, kështu që ia ka dalë ta ndalojë veturën dhe ta arrestojë shoferin e saj. Substanca që dyshohet se është materie eksplozivi është dërguar për ekzaminim kurse i arrestuari është dërguar në bazë dhe po intervistohet”, tha Kelani.


A1 Report - Prishtinë, ndalohet makina me... by shqiptarjacom




Serbit të dyshuar për planifikim aktesh terroriste në Prishtinë, ndalim 48 orësh
Prokuroria Speciale e Kosovës njofton se po heton rastin e ndodhur mbrëmë, kur u arrestua një person, që kishte në veturë një sasi eksplozivi. Përmes një njoftimi për media, bëhet e ditur se prokurori mbrëmë, më 25 dhjetor 2014, rreth orës 21.00, ka urdhëruar ndalimin policor për 48 orë ndaj personit Slobodan Graviç., shtetas i Republikës së Serbisë, për shkak të dyshimit se ky person ka kryer veprën penale: “Përgatitja e veprës terroriste ose veprave penale kundër rendit kushtetues dhe sigurisë së Republikës së Kosovës”.

Në makinë e personit të dyshuar është gjetur sasi e madhe eksplozivi, që dyshohet se ka qenë e planifikuar të përdoret për kryerjen e akteve terroriste
 
“Prokurori kujdestar nga Prokuroria Speciale e Republikës së Kosovës, mbrëmë më 25 dhjetor 2014, rreth orës 21.00 ka urdhëruar ndalimin policor për 48 orë ndaj personit S.G., shtetas i Republikës së Serbisë, për shkak të dyshimit se ky person ka kryer veprën penale: “Përgatitja e veprës terroriste ose veprave penale kundër rendit kushtetues dhe sigurisë së Republikës së Kosovës”, nga neni 144 i Kodit Penal të Republikës së Kosovës.

Në veturën e personit të dyshuar është gjetur sasi e madhe e eksplozivit, që dyshohet se ka qenë e planifikuar të përdoret për kryerjen e aktiviteteve terroriste.

Rasti është në fazën fillestare të hetimeve nga një prokuror vendës i Prokurorisë Speciale, i cili do t’i kërkoj gjykatës që ta caktoj masën e paraburgimit për të dyshuarin”.