Akuzat e Rithemelimit: 4 të vrarë në 2 atentate nën hundën e policisë! Shqipëria në gjendjen e emergjencës së rendit dhe sigurisë  

Sekretari për Diasporën i Rithemelimit, Indrit Hoxha ka reaguar për dy atentatet me 4 viktima që ndodhën brenda një jave në vendin tonë. Duke mos lënë akuzat për qeverinë, Hoxha thotë se situatat kriminale ndodhin nën hundën e policisë. Ndër të tjera theksoi se PD ka lëshuar thirrjen për emergjencën rendit dhe sigurisë duke sqaruar se duhen kërkuar përgjegjësitë për rendin dhe korrupsionin.

“Rendi dhe siguria publike në Shqipëri janë përkeqësuar duke dalë jashtë kontrollit në harkun e një jave. Katër të vdekur dhe një i plagosur rëndë në atentate të përgjakshme, nën hundën e Policisë së Shtetit, dhe në akse rrugësh të rrahura kombëtare, janë shenjë se qeveria nuk menaxhon vendin. Ajo thjesht mbikëqyr korrupsionin. Mbrëmë në Milot dhe një javë më parë në Fushë Krujë, krimi i organizuar dëshmoi se është më prezent dhe më i sofistikuar se shteti. Për faktin e thjeshtë se shteti nuk e tremb më, por duke qenë pushtet e jo shtet, bashkëpunon me të. 

Partia Demokratike lëshon sot thirrjen kombëtare për trajtimin si emergjencë të rendit dhe sigurisë publike. Përfshijmë në këtë thirrje të gjithë aktorët relevantë të cilëve u bëjmë me dije se Shqipëria nuk menaxhohet më nga qeveria e para 9 viteve. Përgjegjësitë, si për rendin, si për korrupsionin, si për të palarat e këtyre 9 viteve, duhen kërkuar në të sotmen, jo në dekadën e shkuar”, tha Hoxha.

LEXO EDHE:
Mero Baze: Beteja këmbëngulëse e Ramës ndaj një reportazhi të RAI

Hoxha thotë se bota e krimit nuk shqetësohet fare për forcën e shtetit. Për këtë arsye e cilëson Shqipërinë si një vend në rrezik ndaj duhet të përballet me emergjencë dhe zgjidhje kombëtare. Sipas Rithemelimit, kjo vjen vetëm me largimin e qeverisë.

“Arsyet e acarimit të elementëve kriminalë, nuk kanë të bëjnë me gjë tjetër veçse me ndarje territoresh, me zona influence, hapësira që lejohen, jo vetëm nga paaftësia qeveritare, por sidomos nga implikimi qeveritar. Bota e krimit nuk po i bën karshillëk qeverisë. E kundërta, ajo nuk shqetësohet më prej forcës së shtetit, sepse e sheh si partner dhe si të ngjashëm. Partia Demokratike nuk dëshiron të bëjë politikë me vdekjen, por në të njëjtën kohë, ne nuk mund të mbyllim sytë para një emergjence kombëtare. 

Nuk kemi të bëjmë me luftë bandash, dhe as rivalitet, por me kapitullim. Ndër dy të ngjashmit, për të zezën e qytetarëve, luftën po e fitojnë ata që i bëjnë punët e zeza me kohë të plotë.  Kjo e bën Shqipërinë një vend në rrezik, dhe çdo rrezik përballet me emergjencë dhe zgjidhje kombëtare. Një qeveri që ka kapitulluar duhet të hapë rrugën. Rrugë tjetër nuk ka!”, - tha Hoxha. 

A.M./r.k./Shqiptarja.com

TAG:
• Rithemelimi
• edi rama
• atentat
• 3 te vrare ne Fushe Kruje