Në emisionin "Të Pakspozuarit" deputeti i PD, Enkelejd Alibeaj, në replikë me gazetarin Carlo Bollino, u shpreh se video ku pretendohet se është regjistruar Agron Xhafaj, është realizuar nga një gazetar dhe ka qenë ky i fundit ai që e ka dorëzuar në selinë e PD materialin audio dhe video.

Sipas tij, gazetari e ka dorëzuar në selinë blu për shkak se institucionet si Prokuroria dhe Policia nuk kanë besueshmëri dhe kontrollohen nga kryeministri Edi Rama.

Përgjimet janë bërë nga gazetarët. Falë Zotit në këtë vend ka edhe gazetarë trima. Ky material është sjellë në PD. Këtë duhet ta bënte Prokuroria, por cila Prokurori? Me Arta Markun? Donika Prelën? Sot shteti është angazhuar si të mbrojmë Agron Geron Xhafën. Fatmir Xhafaj shkon dhe fut në burg dëshmitarin. 

Deputeti i PD, Enkelejd Alibeaj  

Gazetari Bollino: 'Dëshmitari X', kontradiktor, ja ku gënjeu
Nga ana tjetër, gazetari Carlo Bollino tha se Albert Veliu ka dhënë dëshmi kontradiktore për motivin e arrestimit, dënimin dhe vitin e ndalimit nga autoritetet italiane, thjesht e vetëm për të atakuar vëllain e ish-ministrit të Brendshëm.   

Zoti Albert Veliu ka folur gjatë për historinë personale, që kemi verifikuar se nuk ishte e saktë. Ai ka treguar që ai është arrestuar në vitin 2005, por ai është arrestuar në vitin 2009. Kjo ndryshon lidhjen me zotin Xhafaj.
Ai është kapur në vitin 2009 me heroinë dhe jo kokainë dhe është dënuar me 5 vjet dhe jo 15 vjet. Përse gënjen për elemente kaq banale? Unë dyshoj që ai mund të gënjejë dhe për element të tjera.

Si e shpjegon ai inatin ndaj zotit Xhafaj? Se ai tha me gjithë bashkëpunimin që kemi patur, nuk më ka sjellë as cigare në burg. Ka gjëra që nuk shkojnë, nuk përputhen me logjikën. Nëse dëshmitari gënjen në një pikë mund të gënjejë edhe për gjëra të tjera.

Carlo Bollino, gazetar

Sipas Bolinos, një tjetër problem në dëshminë e Veliut, lidhet edhe me 20 kg marijuanë të cilat ai i kishte blerë me para borxh, ndërsa me këtë dëshmi provon implikimin e tij në trafikun e drogës.

Ai tha unë bleva 20 kg marijuanë me borxh, për të treguar që është trafikantë. Por pastaj tha nuk kisha ndërmend të bëja trafik, por doja të zbuloja sa trafikant është Agron Xhafaj. Kur ju ka dorëzuar përgjimet, këto 20 kg marijuanë ku janë? Në Shqipëri arrestohen njerëzit për 20 gram, këtu kemi një dëshmitar që pranon se ka marrë 20 kg marijuanë. Përse s'e keni dorëzuar në Prokurori?

Carlo Bollino, gazetar

 

Edhe analisti i emisionit “Të Paekspozuarit”, Andi Bushati hodhi dyshime mbi rolin e Dëshmitarit X:

Publiku është futur në kurth mes dy të vërtetave, nga një anë PD dhe nga një anë PS. Nuk ka asnjë dyshim që ky është një skenar i mirëpërgatitur nga Partia Demokratike, pra është një gjë e mirëmenduar. Ka disa pika të errta te ajo dëshmi që më bën të jem dyshues. Fakti që duket qartë që dëshmia është dhënë në PD dhe thotë përgjimi nuk është i imi, por dyshimet janë që përgjimi është i këtij. Dëshmia e tij hedh dyshime që mund të kemi një përgatitje politike si aksion. Ka disa pikpyetje që më shumë ai portretizohet si një dëshmitar politik sesa një dëshmitar që kërkon drejtësi.

Andi Bushati, gazetar

Rendit zhvillimet sipas orarit:
Ora 23:03
'Xhafaj', Carlo Bollino: 'Dëshmitari X', Albert Veliu largoi familjen nga Vlora

Botuesi dhe gazetari Carlo Bollino, deklaroi në “Të Paekspozuarit”, se familja e "dëshmitarit X" të PD, Albert Veliu është larguar nga Vlora që para disa ditësh.

Gazetarët e Report Tv kanë mbërritur në shtëpinë e dëshmitarit, por aty nuk ka pasur njeri, ndërsa fqinjët janë shprehur se e gjithë familja ka disa ditë që është larguar nga lagjia.

Familja e Albertit ka disa ditë që ka ikur, nuk është në Vlorë. Familjarët e këtij Albert Veliut janë larguar nga shtëpia. Këtë ma kanë thënë gazetarët e mi të cilët kanë shkuar në shtëpinë e tij për intervistë. Edhe njerëzit e lagjes kanë thënë se këtu nuk ka njeri, është vetëm Alberti, por edhe ai ka dy ditë pa ardhur.

Carlo Bollino, Gazetar