All Eagles, nis sot festivali i
muzikës etnike e bashkëkohore

TIRANE - “Gjithë shqiponjat ulen këtu” është slogani i “All Eagles Fest”, i cili nis këtë të premte në 18:30 në atriumin (oborrin)  e Muzeut Historik Kombëtar.

Ky aktivitet kulturor tre-ditor, në datat 6, 7 dhe 8 qershor, përfshin muzikantë nga vende të ndryshme, si Italia, Greqia, Austria, Maqedonia dhe Shqipëria, duke vënë theksin te nderimi i diversitetit kulturor dhe muzika cilësore. Vetë emri dhe slogani i këtij aktiviteti, i cili realizohet me mbështetjen e veçantë të Ministrisë së Kulturës dhe Muzeut Historik Kombëtar, kapitalizon mbi simbolin kombëtar të Shqipërisë, i cili megjithatë  mbetet një figurë e fuqishme mbarëkombëtare që e lidh njeriun me mistikën e natyrës dhe trashëgimitë përkatëse kulturore.

Instituti Italian i Kulturës dhe Ambasada Austriake Tiranë janë ndër partnerët kryesorë të këtij aktiviteti që kalon kufijtë formalë dhe bashkon etosin muzikor të vendeve të ndryshme.Si e tillë, shqiponja përfaqëson një nga simbolikat më të epërme të natyrës, dhe nuk i përket një vendi apo kontinenti të caktuar. Shqiponja nuk njeh kufij, dhe flatrat e saj të shpalosura përmbajnë materialin magjik të ëndrrave, poemave dhe rrëfimeve epike.

Për të festuar shumëllojshmërinë kulturore dhe barazinë mes kombeve, ky festival mban emrin “All Eagles”, duke u mbështetur në muzikën etnike me përpunime bashkëkohore nga popuj të ndryshëm. Ndër grupet muzikore pjesëmarrëse mund të përmenden Albanian Folkjazz Quartet (Al), Eugenio Bennato Band (It), Gent Rushi Quartet (Al), Baildsa (Gr), Ensemble Satar (Aus), Letecki Pekinezeri (Mk) e të tjerë.



Redaksia Online
(Shqiptarja.com)