Ambasadorja, Yuri Kim takohet me presidentin Begaj: Rishikuam arritjet e bëra gjatë vitit 2022 si aleatë të NATO-s dhe OKB

Ambasadorja amerikane në Tiranë, Yuri Kim ka zhvilluar një takim me presidentin Bajram Begaj të cilit i ka shprehur vlerësimin dhe urimet për pritjen që Shqipëria organizoi ndaj samitit të përbashkë mes liderëve të BE dhe atyre të Ballkanit Perëndimor.

Me anë të një postimi në twitter, Yuri Kim shkruan se SHBA mbështet të gjitha përpjekjet e Shqipërisë në Reformën në Drejtësi me qëllim anëtarësimin drejt Bashkimit Europian.

“Faleminderit President për mundësinë për t'i shprehur urimet për pritjen e samitit BE-Ballkani Perëndimor. Hera e parë që ky samit mbahet jashtë Brukselit. SHBA mbështet fuqimisht përpjekjet e Shqipërisë për të ndërmarrë hapat e nevojshëm, përfshirë reformën në drejtësi - për t'u bashkuar me Bashkimin Europian”-shkruan Kim.

LEXO EDHE:
Presidenti Begaj vizitë në Urdhrin Sovran të Maltës, takohet me Fra' John Dunlap

Kim bëri me dije gjithashtu se ishte bërë një rishikim i të gjithë arritjeve për vitin 2022 në bashkëpunimin mes dy vendeve si aleatë të NATO-s dhe Këshillit të Sigurimit të OKB-së.

“Ne rishikuam gjithashtu arritjet në vitin 2022, si aleatë të NATO-s, anëtarë të Këshillit të Sigurimit të OKB-së dhe miqtë më të mirë që sollën marrëdhëniet mes Shqipërisë dhe SHBA-ve në nivele të larta historike. Mezi presim të bëjmë edhe më shumë së bashku në 2023 për të forcuar bashkëpunimin në demokraci, mbrojtje dhe biznes”- shprehet ambasadorja.

 

Nga janari 2022 deri në fund të 2023, Shqipëria së bashku me Brazilin, Emiratet e Bashkuara Arabe, Gabunin dhe Ganën janë anëtare jo të përhershme në organin më të fuqishëm të OKB-së,  në Këshillin e Sigurimit.

B.V/Shqiptarja.com

TAG:
• Yuri Kim
• Bajram Begaj
• Presidenca
• Samiti i BE ne Tirane