Ankandi i bonove, qeveria i merr
15 mln euro borxh qytetarëve

Ankandi i bonove, qeveria i merr<br />15 mln euro  borxh qytetarëve
Banka e Shqipërisë ka shitur të martën për llogari të Ministrisë së Financave 15 milionë euro bono thesari të nominuara në monedhën europiane. Sipas burimeve të BSH-së, interesi mesatar ka qenë 5.26%, ndërkohë që qeveria e ka marrë të gjithë shumën e kërkuar. Në ankandin e parë, të zhvilluar në korrik qeveria kishte arritur të siguronte vetëm 11.5 milionë euro nga 15 milionë euo të kërkuara. Kohët e fundit, financat kanë ndërmarrë një fushatë të gjerë ndërgjegjësimi për të tërhequr individët në ankandet e bonove të thesarit, si në lekë ashtu dhe në euro, pasi bankat e mëdha u tërhoqën në pjesën e parë të vitit nga blerja e borxhit të qeverisë, si rrjedhojë e politikave të bankave mëmë për të ulur ekspozimin në letrat me vlerë të qeverisë, duke vënë në vështirësi financat shqiptare për shlyerjen e borxhit.
Me ankandin e djeshëm qeveria arriti të marrë 15 milionë euro borxh në tregun e brendshëm përmes bonove të thesarit të nominuara në monedhën europiane. Sipas njoftimit zyrtar të Bankës së Shqipërisë, qeveria ka arritur të marrë të gjithë shumën e kërkuar me një interes mesatar prej 5.26 përqind. Ky është ankandi i dytë brenda muajit ku qeveria merr borxh në euro.
Ankandi
Këtë herë duket se individët kanë qenë më të gatshëm për të kredituar qeverinë, kjo edhe për shkak të interesit që mbetet dukshëm më i lartë se investimi në depozita, përveçse ofron edhe më tepër siguri. Qeveria u detyrua të kërkonte borxh në valutë nga individët pasi disa nga bankat më të mëdha në vend filluan të ulnin huadhënien për buxhetin me ritme shumë të shpejta, për shkak të kushteve të vendosura nga Bashkimi Europian. Sipas Bankës së Shqipërisë, njëra nga bankat më të mëdha private uli në vetëm brenda tre muajsh peshën në borxhin e brendshëm publik me 3 pikë përqindje duke e vendosur qeverinë në vështirësi për të financuar borxhin e saj. E gjendur përballë kësaj situate Ministria e Financave prej disa muajsh ka nisur një fushatë të gjerë informimi për të nxitur individët që t'i investojnë kursimet e tyre në letrat me vlerë të qeverisë, jo vetëm në valutë por edhe në bonot e emetuar në monedhën kombëtare.
Bankat
Roli dominues i bankave në tregun e borxhit publik të brendshëm si dhe vendimi i disa bankave për të ulur ekspozimin e tyre ndaj rrezikut të bondeve sovrane të vendeve të ndryshme kanë qenë dy shkaqet pas rritjes së ndjeshme të interesave të bonove të thesarit dhe obligacioneve të qeverisë shqiptare në ditët e para të këtij viti, bëhet e ditur nga ekspertët e tregut. Interesat e bonove të thesarit me afat njëvjeçar u rritën ndjeshëm në ankandin e datës 10 janar, kur interesi mesatar i pranuar arriti në 7.11 për qind. Bankat kryesore në Europë, të cilat janë të pranishme në Shqipëri përmes filialeve të veta, nuk i konsiderojnë më bondet sovrane si investime me rrezik të papërfillshëm. Në bilancet e tyre është vendosur që pesha e borxheve të shteteve të ulet. Së fundmi, këto banka duket se po ulin ekspozimin edhe ndaj borxheve publike të Shqipërisë, pavarësisht se ekspertët thonë se reduktimi nuk ka kuptim për sa kohë depozitat janë të shqiptarëve dhe Shqipëria e disponon të drejtën e emisionit monetar.
(Shkrimi u botua sot ne Shqiptarja.com)

(sg/shqiptarja.com)

  • Sondazhi i ditës:

    Shqipëria luan ndaj Italisë sfidën e parë në Euro 2024, kush fiton?



×

Lajmi i fundit

Biden zgjat urdhrin për gjendje të jashtëzakonshme për Ballkanin Perëndimor

Biden zgjat urdhrin për gjendje të jashtëzakonshme për Ballkanin Perëndimor