Anketimi i BB për biznesin shqiptar: Siguria, aksesi në financim dhe burokracitë, më mirë se në Europë

Siguria/ Kompanitë shqiptare grabiten apo vandalizohen tre herë më pak se ato në vendet e BE

Korrupsioni/ Reduktohet në tendera dhe leje ndërtimi. Problem kronik, agjentët tatimorë në terren

Aksesi në financim/ Asnjë ndryshim midis operimit në Shqipëri apo një vend tjetër europian

Burokracitë/ Në Shqipëri një leje ndërtimi, licensë import-eksporti apo hapja e një biznesi kërkon më pak kohë se në BE

Ditën e mërkurë, Banka Botërore publikoi një anketim i cili mat disa tregues të rëndësishëm për biznesin, midis të cilëve korrupsionin, sigurinë, aksesin në financim apo burokracitë e lidhura me hapjen apo operimin e një biznesi.

Pyetësorit të Bankës Botërore iu përgjigjën 377 biznese në të gjithë vendin dhe të dhënat tregojnë një përmirësim të ndjeshëm në disa tregues kyç.

Përsa i përket korrupsionit, 36% e bizneseve në vend shprehen se kanë pasur të paktën një herë një kërkesë për rryshfet.

Një e dhënë e tillë mbetet shqetësuese, edhe pse 36% është një vlerë shumë më e ulët se përceptimi i përgjithshëm për korrupsionin në vend.

Por, ku përballen bizneset me korrupsionin? Kjo pyetje merr përgjigje nga të dhënat e tjera të studimit.

Përsa i përket marrjes së një leje ndërtimi. Vetëm 17% e bizneseve shprehen se një zyrtar kërkon apo pret një dhuratë/rryshfet. Mesatarja europiane në këtë tregues është po 17%.

Përsa i përket tenderave. 15% e bizneseve kanë përceptimin se duhet të paguajnë për të fituar një kontratë publike. Më e ulët se mesatarja e vendeve europiane (19%) apo mesatarja rajonale (21%).

Treguesi që fryn përceptimin e korrupsionit në Shqipëri është marrëdhënia e bizneseve me agjentët tatimorë. Nëse 35% e bizneseve shqiptarë shprehen se u janë kërkuar lekë nga agjentët tatimorë, mesatarja europiane është vetëm 9%.

Siguria është një prej treguesve më pozitivë për bizneset në Shqipëri. Vetëm 5,7% e bizneseve të anketuara pranojnë se kanë pësuar dëme nga vjedhjet apo vandalizmi.

Ndërkohë, mesatarja europiane është 13%, ndërsa mesatarja e të gjithë vendeve të marra në studim është 20%. Rrjedhimisht, zëri i kostove të sigurisë për biznesin shqiptar është ndër më të ultit në botë, vetëm 2,3%.

Aksesi në financim gjithashtu shënon përmirësime të ndjeshme. Vetëm 21% e kompanive të anketuara shprehen se kanë pasur vështirësi për të siguruar financime nga bankat, që mbetet në normën europiane (18,1%) dhe nen ate rajonale (26%).

Ndërsa përsa i përket burokracive, reduktimi i tyre i kursen shumë kohë dhe kosto biznesit.

Për marrjen e një license importi, një biznesi shqiptar i nevojitet mesatarisht një javë kohë, ndërsa mesatarja në Europë dhe në vendet e rajonit është 19 ditë.

Pas automatizimit të sistemit për marrjen e lejes së ndërtimit, në Shqipëri nevojiten tanimë mesatarisht 36 ditë. Ndërsa marrja e një leje ndërtimi në Europë, mesatarisht kërkon 92 ditë.

Ndërsa marrja e një license që lejon operimin në tregun shqiptar kërkon 11 ditë kohë, nga 26 që nevojitet mesatarisht në Europë./Lexo.al

B.K./Shqiptarja.com

TAG:
• banka boterore
• korrupsion