Ardian Çene, penelata të reja 
mbi sendet e abstraktuara

TIRANE- “Manipulations" është tema e ekspozitës së parë personale të artistit Adrian Çene që do të çelet në Galerinë Kombëtare më 6 Gusht 2014, ora 19.30. Ekspozita do të qëndrojë e hapur deri më datë 24 Gusht 2014. Disa kohë më parë, rreth vitit 2009, përmes vizatimit, Adrian Çene, mbivendoste imazhin e tij imagjinuar mbi një imazh të dhënë, konkret e të palëvizshëm fotografik. Tashmë ai ka krijuar një realitet të ri në botën e artit pamor shqiptar, realitetin magjik që qëndron krahas me shpeshtimin e penelatave në tablot piktorike, ku së fundi ato vishen me emocion.

Te artisti Çene, nuk bëhet fjalë thjesht për një eksperiment, siç ndodh rëndom me artistët e arteve pamore, por për një risi artistike. Ky është edhe mendimi kuratorial përmes të cilit përshkruhet ky realitet estetik i piktorit Ardian Çene: “Fotografia mediatike dhe riciklimi i saj u bënë bazamenti fillestar i përpunimeve të Adrian Çenes, i cili ndjeu se duke manipuluar imazhe të tilla përmes pikturimit dhe veçimit të detajit, që e ngacmonte më shumë, krijonte një realitet të ri, të ndryshëm nga piktura me vaj, por të afërt me procesin dhe lojën e tij foviste të ushtruar vite me radhë. Në këtë proces ai e çrregullon imazhin ekzistues dhe ia ndryshon informacionin fillestar, por nuk ia humb zanafillën apo imazhin e memorizuar”.

Pikturat në këtë ekspozitë janë një imazh jo real, i abstraktuara përmes ngjyrave, të cilat vijnë me një gjuhë shumë më të qetë, janë më pak kontraktuese dhe anojnë drejt plotësisë dekorative. Çene është një prej artistëve modernë shqiptarë (lindur në 1969), dhe është diplomuar për pikturë në Institutin e Lartë të Arteve në vitin 1992. Ai jeton dhe punon në Tiranë. Krijimtaria e tij ka kaluar përmes përshtatjes së kërkimeve individuale në botën e pafund të trajtesave që arti i ditëve të sotme i sugjeron çdo artisti. Në këto 20 vite krijimtari Çene është dalluar për një pikturë stilistike foviste, ku dominon ekspresiviteti figurativ i sendeve të abstraktuara, kontrasti në marrëdhëniet e ngjyrave dhe përdorimi i një linje të plotë vizatuese. Në ekspozitë do të paraqiten rreth 70 punime në teknikën tempera-akrilik mbi letër dhe akuarel mbi letër.


Shkrimi u botua në Shqiptarja.com (print) në 2 Gusht 2014

Redaksia Online
(d.a/shqiptarja.com)