Armenia, Rama: Me kuqezinjtë në
sprovën e (para)fundit me një kusht

Kryeministri Rama e cilëson finale ndeshjen përballë Armenisë, e cila do të vendosë fatin e Shqipërisë nëse do të kualifikohet në Francë 2016 direkt.
 
“Është e (para)fundit sepse është e fundit në grup, për të shkuar direkt në Francë me një fitore dhe, në rast barazimi ose humbjeje, është e parafundit sepse Shqipërinë e pret sprova finale në playoff me të tretën e një grupi tjetër.
 
Dhe pas dy humbjeve të minutave të fundit, të dielën në 18.00, është koha për të qenë përsëri së bashku me Kuqezinjtë në Parkun e Kryeministrisë në përpjekjen e vështirë po aspak të pamundur, të kualifikimit direkt në Finalet e Europianit”deklaron kryeministri.
 
Rama fton në Parkun e Kryeministrisë të gjithë tifozët kuqezinj, por me një kusht.
 
 “Kush ka shfryrë fjalë të tepërta zemërimi ndaj Kombëtares pas ndeshjes së mbrëmshme nuk është i ftuar!
 
Kush është kuqezi i vërtetë Kombëtaren e do njësoj kur fiton e kur humbet dhe mund të zemërohet me të vetëm kur Kuqezinjtë nuk japin gjithçka nga vetja në fushën e lojës.
 
Por kjo deri tani nuk ka ndodhur kurrë me këtë Kombëtare, e cila shkon apo nuk shkon në Francë, është ngjitur në majën e historisë së futbollit shqiptar”shkruan Rama.


d.b/shqiptarja.com