Arrestimi i Fullanit, drejtimi i Bankës së Shqipërisë i kalon Elisabeta Gjonit

Procedura për zëvendësimin e postit të Guvernatorit të Bankës së Shqipërisë parashikohet në ligjin e BSH. Në nenin 53 të ligjit nr.8269, datë 23.12.1997, "Për Bankën e Shqipërisë", thuhet: Guvernatori vepron si drejtor i përgjithshëm ekzekutiv i Bankës së Shqipërisë, i ngarkuar për mbarëvajtjen e veprimtarisë së përditshme të Bankës së Shqipërisë. Në rast se guvernatori mungon ose është në pamundësi për të vepruar, zëvendësguvernatori i parë vepron në cilësinë e drejtorit të përgjithshëm ekzekutiv të Bankës së Shqipërisë.

Në bazë të kësaj, drejtimin e Bankës së Shqipërisë aktualisht e merr në dorë zv.Guvernatorja e parë, Elisabeta Gjoni.

Arrestimi i Guvernatorit i jep të drejtë Kuvendit që të kërkojë shkarkimin e tij nga detyra. Deri në momentin që Guvernatori nuk ishte arrestuar Kuvendi nuk kishte asnjë mundësi për të ndërmarrë procedurë për ta shkarkuar.

Pavarësisht mungesës së Guvernatorit, Këshillimi Mbikqyrës, i drejtuar nga zv.Guvernatorja, ka për detyrë që të drejtojë mbledhjet si dhe të marrë vendimet e nevojshme në lidhje me zhvillimet ekonomike.
Por, në nenin 47 të ligjit për Bankën e Shqipërisë nr. 8269 datë 23.12.1997 parashikohen rastet për shkarkimin e guvernatorit dhe anëtarëve të Këshillit Mbikëqyrës. "Çdo anëtar i Këshillit Mbikëqyrës, duke përfshirë guvernatorin dhe zëvendësguvernatorët, pezullohet nga detyra nga Këshilli i Ministrave dhe shkarkohet nga Kuvendi në qoftë se ai ose ajo:
a) është në pamundësi për të shërbyer në Këshillin Mbikëqyrës të Bankës së Shqipërisë, sipas nenit 46;
b) është dënuar nga gjykata për një vepër penale, për të cilën ligji parashikon dënimin me burgim;
c) është në pamundësi për të paguar detyrimet monetare ose është deklaruar i falimentuar dhe nuk është rehabilituar;
ç) është ndaluar ose pezulluar nga gjykata të ushtrojë detyrën si nëpunës
shtetëror apo në shërbimin publik ose të ushtrojë veprimtarinë apo
mjeshtërinë;
d) gjatë ushtrimit të detyrës, në mënyrë aktive merr pjesë në veprimtari politike.

Guvernatori zgjidhet nga Kuvendi me propozim të Presidentit të Republikës për 7 vjet, me të drejtë rizgjedhjeje.

Me Vendim të Kuvendit të Republikës së Shqipërisë, Nr. 142, datë 17.11.2011, Ardian Fullani është rizgjedhur si Guvernator i Bankës së Shqipërisë./ATSH/