Artan Hoxha: Meta tha se kishte informacione se do ketë konflikte, sot ka detyrim të tregojë burimet e tij

Premtimin e kreut të qeverisë Edi Rama se pas 30 qershorit bashkitë e djathta nuk do të heqin asnjë grua nga puna, gazetari Artan Hoxha e quajti të vështirë për t'u përmbushur pasi sipas tij këtë e kanë në dorë vetëm kryetarët e bashkive.

"Edi Rama premtoi se nuk do heqë asnjë grua nga puna, por këtë nuk e ka në dorë Edi Rama,por kryetarët e bashkive, pasi ata nuk mund të punojnë me ata që kanë punuar kundërshtarët e tyre", deklaroi Artan Hoxha.

Qëndrimin e opozitës për të mos marrë pjesë në zgjedhjet lokale të 30 qershorit, Artan Hoxha e quajti një strategji të gabuar që nuk i shërben në vazhdimësi. Ai solli edhe disa precedentë të ngjashëm në rajon që kanë treguar se nuk mund të fitosh duke bojkotuar.

"Opozita ka humbur në tavolinë 27 njësi vendore. Nuk e kuptoj këtë strategji të dorëzosh në tavolinë bastionet historike. Ky është sot trishtimi më i madh i PD sot. Nuk e kuptoj si një opozita bën një betejë të madhe dhe në fund dorëzon në tavolinë bazën tënde. Kjo ndodhi edhe në Greqi, por atje patëm zgjedhje. Kemi shembullin e zgjedhjeve të fundit në Stamboll, ku opozita votoi kundër Erdogan. Edhe precedentët në rajon kanë dëshmuar se nuk fiton duke bojkotuar", u shpreh Artan Hoxha.

Artan Hoxha deklaroi se pavarësisht se opozita i quan votime ato që ndodhën dje në Shqipëri, nga OSBE u njohën si zgjedhje. Ai tha se presidenti gjatë ditëve të fundit po kalon kohën në plazh por duhet parë nëse po punon për të mbajtur atë që tashmë e ka quajtur si datë zgjedhjesh.

"Çdo i pakënaqur nga qeveria, prisnin diçka nga opozita. U bënë votimet, pavarësisht se OSBE sot tha se pati zgjedhje. Ajo e tha qartë, se në Shqipëri nuk iu kushtua rëndësi të drejtës së qytetarit për të zgjedhur por asaj të politikanëve. Opozita nuk ka thënë se është dakord se do votojë në 13 tetor. Ajo thotë se nuk pranon asnjë datë zgjedhjesh me Edi Ramën kryeministër. Nuk i ka kërkuar presidentit të ndryshojë datën e zgjedhjeve. Kam parë presidentin që po e kalon kohën në plazh, por me dekretin e fundit na ka thënë që ka zgjedhje në 13 tetor, të tregojë sa i zoti është, sa burrë është", tha Hoxha.

Gazetari i Report tv, Artan Hoxha deklaoi se opozita zbuti qëndrimin e saj që pas kthimit të Kryemadhit nga SHBA. Ai deklaroi se përgjatë protestës opozita tregoi se mund të kontrollonte edhe protestuesit dhe militantët e saj në momente kur e kërkonin ndërkombëtarët.

"Menjëherë Kryemadhi ndryshoi qëndrim kur erdhi nga SHBA dhe më pas ndryshoi menëjherë edhe në raport me deklaratat politike. Me sa duket edhe gjatë protestave nga 16 shkurti, patëm disa protesta kur kishte incidente, sepse ishin të organizuara të kishte një ndikim. Kur u tha që do kishte incidente, pati, ndërsa kur u tha se nuk do kishte, nuk pati. Në këtë prizëm u pa edhe përfshirja e ushtrisë në ruajtje të ambasadave .

Ndryshe nga sa ishte paralajmëruar opozita ndryshoi strategji. Ajo nuk u bë më palë për rë ushtruar incidente. Në pamë militantë të opozitës që u kujdesën për fasadën. Opozita frenoi militantët dhe nuk i lejoi të konfliktoheshin me ata që nuk ka të njëjtë bindje politike", tha Hoxha.