ITALI - Edhe këtë verë në Continassa u përsërit i njëjti skenar,  paraqitja në qendrën mjekësore 'Juventus Medical' e futbollistëve të grumbulluar për fazën përgatitore, por që prej kohësh nuk bëjnë pjesë në projektin teknik të Juventusit. Megjithatë, ata vazhdojnë të jenë nën kontratë dhe klubi nuk po arrin t’i largojë.

Rastet më të spikatura janë Arthur Melo dhe Arkadiusz Milik. Braziliani nuk ka luajtur asnjë ndeshje me fanellën bardhezi prej më shumë se katër vitesh, ndërsa Milik ka grumbulluar vetëm 34 minuta lojë gjatë dy sezoneve të fundit. Si pasojë, të dy po shndërrohen në një barrë të rëndë edhe për merkaton e Juventusit.

Kjo situatë është rezultat i vendimeve të ngjashme të klubit, rinovime kontratash të bëra kryesisht për të shpërndarë pagat në disa vite dhe për të ulur ndikimin në bilanc, pas dështimit të tyre në aspektin sportiv.

Arthur mbërriti te Juventusi në verën e vitit 2020, si pjesë e shkëmbimit me Miralem Pjanic nga Barcelona, në një operacion të vlerësuar 72 milionë euro plus 10 milionë bonuse. Nga gjashtë sezonet që kishte kontratë, ai kaloi vetëm dy në Torino, ndërsa më pas u huazua te Liverpool, Fiorentina, Girona dhe Gremio, duke u rikthyer çdo herë te Juventusi.

Për të zbutur ndikimin financiar, klubi i zgjati kontratën dy herë. Aktualisht, Arthur i kushton Juventusit rreth 6.5 milionë euro si vlerë e mbetur në bilanc dhe përfiton një pagë prej afro 5 milionë eurosh bruto në sezon.

Eksperienca e fundit në Brazil ishte pozitive, por mesfushori vazhdoi të vuante nga problemet fizike. Dy dëmtime muskulore e kufizuan ndjeshëm që nga janari, duke e bërë të vështirë si një rikthim te Juventusi, ashtu edhe gjetjen e një klubi të ri, pavarësisht se ende nuk ka mbushur 30 vjeç.

Milik, dëmtimet dhe dëshira për të mos u dorëzuar

Pikërisht dëmtimet e vazhdueshme muskulore dhe të kyçeve janë arsyeja kryesore pse Arkadiusz Milik vazhdon të jetë pjesë e Juventusit. Këto probleme kanë ndikuar edhe në gjendjen e tij emocionale.

"Depresioni është një fjalë e rëndë dhe nuk do të thosha se kam qenë klinikisht i depresionuar, por kam kaluar periudha shumë të vështira emocionalisht. Ne futbollistët shpesh mendojmë se gjithçka rrotullohet rreth nesh. Pastaj kupton se filmi ku ishe protagonist vazhdon edhe pa ty. Je ulur mënjanë dhe askush nuk të kushton më vëmendje. Të mungojnë adrenalina, dopamina dhe emocionet," tha Milik për radion polake RMF.

Ai shtoi: "Çdo herë përsëritej i njëjti cikël, shpresë, stërvitje, buzëqeshje, një dëmtim i ri dhe më pas një rënie e thellë emocionale. Në një moment mendova se nuk mund ta përballoja më. Por brenda meje kishte gjithmonë një zë që më thoshte të vazhdoja, sepse e dua futbollin. E di që në jetë ka probleme shumë më të mëdha dhe se jeta më ka dhënë më shumë sesa kam ëndërruar ndonjëherë. Për këtë arsye do të vazhdoj të luftoj. Besoj se mund t’ia dal dhe dua ta provoj."

Sulmuesi polak është i lidhur me Juventusin me kontratë deri në vitin 2027, pas rinovimit të bërë në vitin 2025 për të shpërndarë pagën në disa sezone. Megjithatë, vetëm dy paraqitje kundër Sassuolos dhe Genoas gjatë dy viteve të fundit tregojnë se është shumë e vështirë të llogaritet tek ai.

Kështu, si për Milikun ashtu edhe për Arthurin, rreziku për të mbetur në skuadrën e drejtuar nga Luciano Spalletti, pa u marrë realisht në konsideratë, është gjithnjë e më i madh.