Artistja Agnese Purgatorio na njeh 
me “botën e portretit” të dyzua

TIRANE- Agnese Purgatorio, artistja italiane e afirmuar në nivel ndërkombëtar vjen në Shqipëri me një ekspozitë personale, pjesë e një projekti të Instituteve të Kulturës Italiane, Këln, Strasburg, Zagreb dhe Tiranë. Kjo ekspozitë e fundit mundësohet nga Ministria e Punëve të Jashtme të Italisë. Projekti quhet “Kufijtë: gjuha, hapësira, objektet, njerëzit”, dhe është konceptuar dhe kuruar nga Prof. Martina Corgnati, lektore e Akademisë Albertina në Torino.

Artistët e përfshirë janë: Agnese Purgatorio, Agostino Ferrari, Donatella Spaziani dhe Maria Cristina Carlini. Projekti fillon në Tiranë të enjten pasdite ora 18.30 te Pallati i Kulturës me ekspozitën personale me prerje antologjike të fotografes A. Purgatorio, ku do të shfaqen 12 vepra dhe një video-instalim. Ekspozita do të qëndrojë e hapur deri më 21 gusht 2014. Artistja prej vitesh punon mbi temën e mërgimit dhe klandestinitetit, duke u përballur në mënyrë sistematike me idenë, reale dhe metaforike, të kufirit si rrugë e shënuar nga historia në trupin e gjallë të gjeografisë. A. Purgatorio, lindur në Bari më 1964, eksploron me një vështrim në dukje sipërfaqësisht të ftohtë dhe të kthjellët, botën e “portretit”, ose më mirë të themi, fytyra dhe personazhe që sugjerojnë menjëherë një “shqetësim, nje prerje të dyzuar të realitetit.

Një realitet i “huajëzuar”, në kundërshtim me realitetin. Gati si një vello që ngrihet në ajër dhe sugjeron një dimension tjetër, dyzimin e saj. Puna e artistes është trasformuar ndër vite prej “fiksimit” konceptual të fillimit të karrierës, në strukturimin e minihistorive të një jete normale, të përditshme, pothuaj në shkëndija kujtese, urgjenca të të dhënave mbi kushtet njerëzore në Portugali ose Brazil, etj, vende ku kultura dhe letërsia kanë një venë surreale. Ajo ka ekspozuar në Bienalen Mesdhetare të Artit, Algjeri 1990; ku ka marrë çmimim European Panorama më 1994-n. 


Shkrimi u botua në Shqiptarja.com (print) në 3 Korrik 2014

Redaksia Online
(d.a/shqiptarja.com)