'Asgjë s’do të ndodhë më 5 Janar', Komisioni i Rithemelimit-Bashës: Demokratët do marrin në dorë fatet e tyre ditët e para të vitit të Ri, Basha aseti i Ramës

TIRANË- Komisioni i Rithemelit të PD-së, i ngritur në Kuvendin e 11 dhjetorit të Sali Berishës, i ka cilësuar qesharake dy konferencat për mediat që ka mbajtur kryeministri Edi Rama dhe Lulzim Basha. Në reagim, ato shkruajnë se nga kjo konferencë nuk u pa gjë tjetër veçse Rama që numëronte arritjet e tij që i gjuajnë imagjinare, e ndërsa për Lulzim Bashën, thotë se është vegël e Edi Ramës.

“Ne ditën e parafundit të vitit që po lëmë pas, shqiptarët dëgjuan njëri pas tjetrit buratinin e qeverisë dhe kukullën e tij që vazhdon të uzurpojë dhe për pak ditë PD në rolet e tyre 8 vjeçare. Si çdo vit buratini i qeverisë që kalon nga skandali në skandal, foli për suksese imagjinare, pasojat e të cilave kanë detyruar 500 mijë shqiptarë të largohen nga vendi. Në anën tjetër, kukulla e tij vazhdoi refrenin bajat të betejave që sapo kanë filluar dhe pas 8 vitesh humbjesh, deshtimesh dhe disfatash, u paraqitet shqiptarëve si ardhmja!

Sot aseti më i madh i Edi Ramës është Lulzim Brava sepse përmes tij, Rama nuk u ka vjedhur vetëm të tashmen dhe të ardhmen por mbi të gjitha shpresën! Arsyeja e vërtetë përse rregjimi më i korruptuar i Europës sapo ka siguruar mandatin e tretë është opozita e korruptuar e Lulzim Bravës dhe pazareve qe ai bën tash 8 vjet me sakrificat e demokratëve! Lulzim Brava ka humbur zgjedhjet, ka humbur qytetarët, ka humbur demokratët, ka humbur delegatët, ka humbur strukturat dhe vetë Partinë Demokratike, por i gënjen mendja se do mund të vazhdojë pazaret dhe marrveshjet e fshehta me Edi Ramën me vula dhe brava”, thuhet në reagim.

LEXO EDHE:
Plani i investimit për Thethin, Rama: Lehtësojmë taksimin! Projekt i ri për furnizimin me energji, mbështetje për panele diellore

Ato kanë edhe një paralajmërim për Lulzim Bashën, i cili tha se asgjë nuk do të ndodhë në 5 janar, afatin e fundit që i kanë lënë për lirimin e zyrës. 

“Kjo ka marrë fund! Në ditët në vijim, demokratët do të marrin në dorë fatet e tyre duke u bërë përmbarues të vullnetit të tyre politik. Koha kur sakrificat e tyre nëpërkëmbeshin për pazaret e Lulzim Bravës kanë marrë fund. Ditët e para të Vitit te Ri do të shënojnë ndarjen përfundimtare nga pazar-humbjet dhe rikthimin e shpresës tek qytetarët dhe demokratët për një opozitë të vërtetë dhe fituese”, përfundon njoftimi.

B.K./Shqiptarja.com

TAG:
• edi rama
• lulzim basha
• PD
• sali berisha
• Lufta brenda PD
• komisioni i rithemelimit