Ashton fton për pajtim kryeministrat
Thaçi e Daçiç në Bruksel

BRUKSEL - Baronesha Ashton ka thirrur sot për një darkë pune në Bruksel, kryeministrat e Serbisë dhe Kosovës, Daçiç dhe Thaçi, pas polemikave të ashpra lidhur me ndalimin e vizitave të zyrtarëve serbë në Kosovë për zgjedhjet e 3 nentorit

Kryeministri serb Daçiç tha se Serbia do tërhiqet nga procesi i dialogut nëse Prishtina nuk e kthen vendimin, por zyrtarët e Prishtinës thanë se vendimi i tyre ishte i pakthyeshëm.

Sipas agjensisë së lajmeve B92, për Daçiç ky ndalim është një skandal i paprecedent, duke shtuar se kur u informua se diçka e tillë mund të ndodhte, paralajmëroi BE-në për pasojat që ajo mund të shkaktonte.

Megjithatë, ai theksoi se është në interes të Serbisë të vazhdojë procesin e normalizimit dhe beson se presioni i Brukselit mbi Prishtinën, do të japë rezultat.

Nga ana tjetër, Thaçi tha javën e kaluar se ndalimi ishte një vendim autonom brenda autoritetit konstitucional dhe ligjor të qeverisë së Prishtinës.

Zyrtarët e BE kanë shmangur komentet në publik lidhur me çështjen. Por përfaqësuesi i tyre, i cili insistoi të qëndrojë anonim, deklaroi për agjensinë e lajmeve Tanjung, besimin e tij se me gjithë fjalët e ashpra të përmendura nga të dyja palët, konflikti mund të zgjidhet.

Ai tha se është në interes të të gjithëve që dialogu të vazhdojë, pasi procesi i integrimit në Europë lidhet ngushtë me normalizimin e marrëdhënjeve ndërmjet Beogradit dhe Prishtinës.

Ndërkohë Komisioni Europian do të paraqesë në dhjetë ditë raportin vjetor të progresit mbi Serbinë dhe Kosovën.

Redaksia online
(e.d/arsh/shqiptarja.com)