Kandidati për president i Federatës Shqiptare të Futbollit, Shpëtim Hala, i cili nuk  mori asnjë votë në zgjedhjet e zhvilluar më datën 7 shkurt, nuk ka ngelur pa gjë. FSHF ka menduar ta afrojë në familjen e madhe të futbollit, duke e caktuar vëzhgues të arbitrave, me qenë se ai në ta kaluarën ishte gjyqtar në Itali dhe ka eksperiencën e duhur. Hala është caktuar vëzhgues në ndeshjen e Kategorisë së Dytë, Sopoti-Spartaku, e zhvilluar në Elbasan.

Shpëtim Hala u propozua nga klubi i Delvinës, por nuk mori dot edhe votën e delegatit të klubit që e propozoi për president të Federatës Shqiptare të Futbollit. Një anë e medaljes që tregon hapur se Hala nuk kishte asnjë shans kundrejt rivalëve Duka e Fino, të cilët sfumuan totalisht pedagogun e universitetit të Elbasanit. Pas votimit në Asamblenë Zgjedhore, Hala u shpreh që nuk janë respektuar rregullat e konkurrimit të ndershëm, madje do të dërgonte edhe një ankesë zyrtare në UEFA, por me lëvizjen e fundit, duket se FSHF ka sistemuar edhe një zë kundër.

Siç dihet, procesi zgjedhor i zgjedhjeve të FSHF është ankimuar në Gjykatën e Arbitrazhit Sportiv në Lozanë nga kandidati Bashkim Fino. Mbeten për t’u parë zhvillimet, nëse do të ketë përsëritje të zgjedhjeve apo KAS do të cilësojë legjitim zgjedhjen e Armand Dukës. Interesant është fakti se zgjedhjet e Komitetit Ekzekutiv janë manipuluar totalisht, kjo e faktuar edhe nga Report Tv, por asnjë kandidat humbës nuk e ka denoncuar në organet kompetente.

d.b/shqiptarja.com