Dy dyshohet të jenë personat e përfshirë në atentatin ndaj 43-vjeçarit Edmond Koçi mëngjesin e së shtunës në Durrës teksa udhëtonte me makinë me shoferin e tij në lagjen numër 16. Policia ende nuk i ka identifikuar autorët, por nisur nga dinamika e ngjarjes, hetuesit besojnë se 2 persona kanë organizuar gjithçka deri në vrasjen me 6 plumba kallashnikovi të Mond Çekiçit, pseudonimi me të cilin njihej ish-anëtari i bandës së Lulzim Berishës.

Pasi i prenë rrugën, njëri ka qëlluar me breshëri kallashnikovi ndërsa tjetri ishte shoferi, që e ndihmoi të largohej nga vendi i ngjarjes me automjet. “Benzi” me ngjyrë të zezë u gjet i djegur pak kilometra nga vendi i ngjarjes, në Katund të Sukthit. Pas këtij momenti, autorët janë larguar me një tjetër automjet.

Burime për Report TV konfirmuan se makina me të cilën u larguan autorët është gjurmuar deri në periferi të Durrësit dhe po punohet për të verifikuar destinacionin e radhës. Policia ka dyshime se makina është larguar përmes disa rrugëve dytësore, në disa fshatra të zonës, ndërsa për asnjë moment nuk është shfaqur të ketë dalë në autostradën Tiranë-Durrës. Mbetet e paqartë nëse autorët kanë ndërruar për herë të dytë makinën për të bërë arratisjen nga vrasja, detaj ky që pritet të verifikohet me këqyrjen e pamjeve të tjera të kamerave të sigurisë në zonë.

Një ditë më parë policia shoqëroi disa persona, mes të cilëve edhe eksponentë me precedent penal, por të gjithë u lanë të lirë. Kur kanë kaluar më shumë se 48 orë nga vrasja, hetimet ende nuk kanë zbardhur emra konkret, për shkak të mungesës së provave.

As dëshmia e shoferit të Çekiçit që është dëshmitar i ngjarjes, nuk hodhi dritë mbi ngjarjen, ndërsa vetë ai ka pësuar gërvishtje të shumta në trup dhe në fytyrë pasi u fsheh nëpër ferra në përpjekje për t’i shpëtuar plumbave.

Hetimet për vrasjen e 43-vjeçarit Mond Çekiçi janë përqendruar në të kaluarën e tij kriminale, i dënuar disa herë për akuzën e mbajtjes pa leje të armëve dhe kundërshtimit të forcave të policisë.  

1616316292_1616228362EDMONDCEKICI.jpg

Viktima Edmond Koçi i njohur si Mond Çekiçi