Fëmijët në të gjithë Australinë u zgjuan të mërkurën pa qasje në llogaritë e tyre në mediat sociale - ndalimi të parë në botë, i projektuar për të mbrojtur ata nën 16 vjeç nga algoritmet që krijojnë varësi.

Asnjë vend tjetër nuk ka ndërmarrë masa kaq të ashpra, dhe zbatimi i ligjit të ri të ashpër po ndiqet nga afër nga ligjvënësit në të gjithë globin.

10 platformat e ndaluara - Instagram, Facebook, Threads, Snapchat, YouTube, TikTok, Kick, Reddit, Twitch dhe X - thonë se do të zbatojnë vendimin, duke përdorur teknologjinë e verifikimit të moshës për të identifikuar personat nën 16 vjeç dhe për të pezulluar llogaritë e tyre, por nuk besojnë se kjo do t’i bëjë fëmijët më të sigurt.

Kryeministri Anthony Albanese tha se ishte një “ditë krenarie” për Australinë.

“Kjo është dita kur familjet australiane po marrin përsëri pushtetin nga këto kompani të mëdha të teknologjisë. Ata po mbrojnë të drejtën e fëmijëve për të qenë fëmijë dhe që prindërit të kenë më shumë qetësi mendore”, tha Albanese.

Por ai pranoi se “nuk do të jetë e thjeshtë”.

Sipas ligjit, platformat duhet të tregojnë se kanë ndërmarrë “hapa të arsyeshëm” për të çaktivizuar llogaritë e përdorura nga personat nën 16 vjeç dhe për të parandaluar hapjen e llogarive të reja, për të shmangur gjobat deri në 49.5 milionë dollarë australianë (32 milionë dollarë).

Çfarë po bëjnë platformat

Përdoruesve të Snapchat do t'u pezullohen llogaritë për tre vjet ose derisa të mbushin 16 vjeç.

Mbajtësit e llogarive në YouTube kanë dalë automatikisht nga llogaritë. Kanalet e tyre nuk do të jenë më të dukshme; megjithatë, të dhënat do të ruhen në mënyrë që ata të mund të riaktivizojnë llogaritë e tyre kur të mbushin 16 vjeç. Fëmijët do të jenë ende në gjendje të shikojnë YouTube pa u identifikuar.

TikTok thotë se të gjitha llogaritë e përdorura nga personat nën 16 vjeç janë çaktiviziuar. Sipas tyre nuk ka rëndësi se cili email përdoret ose emri i kujt është në llogari - teknologjia e saj e verifikimit të moshës do të përcaktojë se kush e përdor atë. Përmbajtja e postuar më parë nga përdoruesit e rinj nuk do të jetë më e shikueshme. 

Twitch thotë se asnjë person nën 16 vjeç në Australi nuk do të lejohet të krijojë llogari të reja, por llogaritë aktuale të mbajtura nga personat nën 16 vjeç nuk do të çaktivizohen deri më 9 janar. 

Meta filloi të heqë llogaritë që u përkisnin adoleshentëve nën 16 vjeç në Instagram , Facebook dhe Threads më 4 dhjetor. Përdoruesit u ftuan të shkarkonin përmbajtjen e tyre dhe ajo do të jetë aty nëse duan ta riaktivizojnë llogarinë e tyre kur të mbushin 16 vjeç.

Reddit tha se do të pezullojë llogaritë e përdoruesve nën moshën 16 vjeç dhe do të parandalojë hapjen e llogarive të reja.