TIRANE - Puna per riasfaltimin në autostradën Tiranë-Durrës ka shkaktuar bllokimin e qarkullimit në segmentin Vorë-Tiranë. Devijimi i qarkullimit të mjeteve fillon para mbikalimit të Kasharit për në rrugën dytësore, drejtimi Vorë-Tiranë deri tek mbikalimi i Kamzës. Ndërkohë ka përfunduar puna në kahun tjetër dhe Mbikalimi i Kamzës – Mbikalimi i Kasharit, drejtimi Tiranë-Vorë, por punimet kanë nisur në drejtimin tjetër të autostradës Vorë- Tiranë..

Sipas burimeve zyrtare nga Fondi Shqiptar i Zhvillimit , punimet e kryera konsistuan në riparimin e defekteve të shtresës asfaltike, riveshjen me asfalt të trupit të rrugës së këtij segmenti dhe vendosjen e sinjalistikës horizontale. Punimet në këtë kah të autstradës pritet të vijojnë deri në fund të muajit prill.

Me qëllim parandalimin e ngjarjeve aksidentale rrugore dhe qarkullimin pa probleme në këtë aks, FSHZH u kërkon të gjithë drejtuesve të mjeteve që lëvizin në këtë segment, të tregojnë kujdes dhe të drejtojnë mjetet me shpejtësi të kufizuar për shmangien e çdo të papriture gjatë kalimit në këtë segment rrugor.

Sipas FSHZH-së, kompania zbatuese e punimeve në bashkëpunim me Drejtorinë e Policisë Rrugore ka marrë të gjitha masat për lehtësimin e lëvizjes së trafikut gjatë këtyre punimeve.

Redaksia Online
(o.b/ Shqiptarja.com)