Avokati i dehur Bashkim Hoxha i çon
SMS kërcënuese Ramës, arrestohet

TIRANE – Kryeministri Edi Rama është kërcënuar nga avokati Bashkim Hoxha, përmes mesazheve telefonike. Avokati është vënë në pranga nga Policia e Tiranës më datë 29 Nëntor rreth orës 23:30, ndërsa prokuroria e Tiranës e cila ka nisur procedimin penal ndaj tij do të hetojë në lidhje me një mesazh kërcënues dërguar kreut të qeverisë në orën 04:00 të mëngjesit të 28 nëntorit, ditën e 102-vjetorit të Pavarësisë.

Avokati Bashkim Hoxha mësohet t’i ketë dërguar ditën e djeshme një SMS kryeministrit Edi Rama, duke i vënë në dukje se kërkon t’i ngjajë dhe të marrë famën e figurës së Ismail Qemalit dhe Isa Boletinin, në mënyrë që fotoja e tij të shpërndahet në gjithë botën. Në SMS, avokati e lëvdonte punën e Edi Ramës dhe se “për të fama e Boletinit dhe Qemalit shumë shpejt do të vinte”. Ky mesazh ka mbërritur në mesnatë, dhe se pas kësaj ka reaguar Rama duke e marrë në telefon avokatin Bashkim Hoxha.
 
Rama, i ka kërkuar se kush ishte dhe se pse e shqetësonte me SMS në mesnatë, duke pasur një bisedë disa minuta me avokatin Hoxha.
 
Ky i fundit ka qenë në gjendje të dehur dhe i trishtuar nga përgjigjja që kishte marrë nga kryeministri, ka vendosur t’i dërgojë atij jo një por 8 SMS kërcënuese, duke e fyer rëndë deri tek nderi i familjes. Fill pas kësaj, Rama ka njoftuar policinë e cila ka kryer arrestimin e avokatit Bashkim Hoxha.

Në cilësinë e provës materiale u sekuestrua telefoni celular i markës “Samsung”, i avokatit Hoxha.

Avokati Bashkim Hoxha do të dalë nesër para Gjykatës së Tiranës për t’u njohur me masën e sigurisë. Emri i avokatit Hoxha është i njohur për mbrojtjen ndaj Dritan Dajtit, të dënuar për vrasjen e 4 policëve në Durrës në vitin 2009.

Hoxha: Doja ta komplimentoja, por isha i dehur, s'mbaj mend asgjë
Por para hetuesve, Bashkim Hoxha, i cili prej një viti nuk ushtron më profesionin e avokatit, ka thënë se donte të komplimentonte kryeministrin për arritje, dhe jo ta kërcënonte.
 
“Doja ta komplimentoja kryeministrin Rama për arritjet, dhe s’kisha asnjë qëllim ta kërcënoja. Por s’mbaj mend pasi kam qenë i dehur”, mësohet të ketë thënë Hoxha para hetuesve.



Redaksia Online
(Shqiptarja.com)

TAG:
• dritan dajti