Avokati i Limajt: Nuk kam gisht
në publikimin e përgjimeve

KOSOVE - EULEX-i dyshon se bisedat telefonike të zyrtarëve të PDK-së i publikuan avokatët që mbrojnë Fatmir Limajn. Këto akuza i hedh poshtë avokati Tahir Rrecaj i cili thotë se nuk ka gisht në këtë punë. Sipas tij, 31 CD-të që i mori nga Prokuroria menjëherë ia ka dhënë ekipit mbrojtës të klientit të tij. Por, Rrecaj nuk e di se çfarë kanë bërë avokatët e të akuzuarve të tjerë, shkruan gazeta Express.

Katër bisedat telefonike mes zyrtarëve të Partisë Demokratike të Kosovës, që u publikuan ditë më parë, mund të mos jenë të vetmet. Janë rreth 31 CD, të cilat EULEX ditë më parë ua ka dorëzuar avokatëve të Fatmir Limajt, dy vëllezërve të tij, Florimit e Demirit, Endrit Shalës, Gani Zogajt, Nexhat Krasniqit dhe Florim Zukës, të gjithë të akuzuar për korrupsion në Ministri të Transportit.

Në mesin e këtij materiali, të cilin EULEX ua dorëzoi para disa ditësh avokatëve mbrojtës të këtyre personave që dyshohet se janë marrë me korrupsion, ndodheshin edhe përgjimet telefonike mes anëtarëve të PDK-së. Është kjo arsyeja që e ka shtyrë misionin e EULEX-it të dyshojë se janë pikërisht këta njerëz që i shpërndanë incizimet e bisedave private mes Adem Grabovcit, Kryeministrit të Kosovës, Hashim Thaçit, Vlora Çitakut, Sami Lushtakut e Kadri Veselit.

Por, sipas Expressit, të gjitha këto akuza i hodhi poshtë Tahir Rrecaj, avokati mbrojtës i deputetit Fatmir Limaj. Ai e bëri të qartë faktin se nuk ka asnjë lidhje me publikimin e atyre bisedave telefonike.

“Në rastin Limaj janë gjashtë avokatë e gjashtë të pandehur dhe janë 31 CD. Nuk e di se kush ka mundur t’i shpërndajë ato materiale. Kryesorja është se unë nuk kam lidhje me atë çfarë thuhet”, ka thënë avokati Rrecaj.

Madje për të qenë me bindës se nuk ka gisht në krejt këtë punë, Rrecaj sqaron se gjithë materialin prej 31 CD-sh e ka pas në zyre jo më gjatë se pesë minuta. Sqaron se provat ia ka dorëzuar menjëherë klientit të tij. “Ato prova i ka marrë asistenti im në Prokurori dhe unë menjëherë ia kam dhënë ekipit të Limajt”, pohon Rrecaj.

“Aty janë 31 CD’ja dhe unë nuk kam as mundësi fizike e as teknike që ato t’i shtyp në kopje. Materialin ua kam dhënë në mënyrë që ata të më ndihmojnë teknikisht në këtë çështje. Do të thotë ky material nuk ka qëndruar as pesë minuta në zyrën time”, thekson Rrecaj.

(eç/shqiptarja.com)