Azem Syla refuzohet nga Zvicrra

Gjykata Federale e Zvicrës, si instanca më e lartë gjyqësore në vend, ka hedhur poshtë ankesën që deputeti nga Kosova Azem Syla kishte bërë pas vendimit që një gjykatë më e ulët kishte marrë për t`ia mohuar atij qëndrimin në Zvicër, raportojnë mediat Zvicerrane.

Gjykata Administrative e kantonit të Soloturnit me një vendim që kishte marrë në muajin shkurt i kishte marrë mbrapa Azem Sylës lejen e qëndrimit të përhershëm (C) në Zvicër.

Këtë vendim gjykata në fjalë e kishte mbështetur me atë se Syla kishte shfrytëzuar ndihmën sociale dhe kompensimet me gjithë faktin se ai ishte zgjedhur deputet në Parlamentin e Kosovës.

Sipas llogarive të bëra nga organet kompetente del se Azem Syla ka marrë gjatë afër dhjetë viteve rreth 400 mijë franga nga shteti zviceran.

Syla, sipas vendimit të fundit të Gjykatës Federale duhet të lëshojë Zvicrën deri në mesin e muajit maj.

Gjykata Federale në fakt nuk e ka marrë fare në shqyrtim ankesën e Azem Sylës. Ata e kanë arsyetuar këtë me faktin se Syla që nga nëntori i vitit 2010 ka zyrtarizuar qëndrimin në Kosovë, në mënyrë që të mund të merrte pjesë në zgjedhjet e atjeshme parlamentare.

Vetëm në periudhën nga 21 shkurti deri më 7 prill 2011 ai ka marrë pjesë në 6 seanca parlamentare dhe ka pasur paraqitje në televizion. Veç kësaj, ai kishte dorëzuar banesën e tij në Zvicër dhe kishte gjetur strehim në banesën e të bijës.

Në Kosovë, Syla ka një shtëpi të veten. Me këtë mund të vihet në përfundim se ai jo vetëm që është i integruar si është më së miri në Kosovë por atje e ka të siguruar ekzistencën, thuhet në vendimin e Gjykatës Federale të Zvicrës.

Azem Syla ishte shef i shtabit të përgjithshëm të UÇK, tani deputet i parlamentit të Kosovës nga rradhët e PDK-së.
/rg/shqiptarja.com