Balla: Zgjedhjet e radhës në 2021! Gjykata Kushtetuese do të ngrihet në Shtator (VIDEO)

Kryetari i Grupit Parlamentar të Partisë Socialiste zhvilloi një takim me strukturat e PS në Bashkinë e Belshit. Duke folur  për situatën politike, numri dy i PS Balla tha se Partia Socialiste është e gatshme për dialog me aktorët e tjerë politikë për çështje të rëndësishme të vendit, por asnjëherë nuk negocijohet implementimi i Reformës në Drejtësi.

Balla tha se presidenti Ilir Meta ka bërë një shkelje të rëndë duke anuluar zgjedhjet e 30 qershorit, gjë për të cilën do të shkarkohet dhe procesi do të certifikohet nga Gjykata e re Kushtetuese  e cila do të jetë gati në shtator.

"Është bërë zakon që sa herë që mbaron një fushatë, duhet të mendojmë për betejën e radhës. Beteja jonë e radhës janë zgjedhjet e përgjithshme të vitit 2021, zgjedhje të tjera nuk ka më.

Ata që dalin çdo natë në TV, nga presidenti që tashmë është një nga drejtuesit e opozitës në Shqipëri, apo kushdo tjetër duhet ta dinë që zgjedhjet vendore u përmbyllën në 30 Qershor. Ishte një ditë e rëndësishme ku fitoi Shqipëria e institucioneve, Shqipëria e zbatimit rigoroz të Kushtetutës, fitoi Shqipëria e angazhimit europian, përkundër Shqipërisë së dhunës dhe të molotovëve.

Ne jemi të gatshëm në çdo moment të dialogojmë dhe të diskutojmë me Partinë Demokratike rrugore, por pikë së pari me ata që kemi në Kuvend, pikërisht për sfidat e rëndësihme të vendit, por këtu nuk përfshihet asnjë lloj negociate për Reformën në Drejtësi.

Ne do të vazhdojmë edhe me hetimin e shkeljes së Kushtetutës nga ana e Presidentit të Republikës. Ilir Meta ka bërë një akt të rëndë i cili duhet hetuar dhe më pas nëse komisioni do të konkludojë që shkelja është e rëndë, sipas nenit 90 të Kushtetutës, do të shkarkohet dhe procesi do të çertifikohet nga Gjykata e re Kushtetutese që në Shtator do të jetë gati për të ushtruar këtë detyrë të rëndësishme.", deklaroi Balla.

TAG:
• Ilir Meta
• taulant balla
• zgjedhjet lokale 2019
• zhdekretimi i 30 qershorit