POP 5

Lajmet më të lexuara të 5 minutave të fundit

Ekonomi

Banka Botërore: Shqipëri,
Biznesi në kushte si Greqia

Zyrtari i lartë i bankës Botërore Indermit Gill ka deklaruar dje para studentëve të Fakultetit Ekonomik se heqja e limitit të borxhit ishte e gabuar. Sipas tij, klima e biznesit në Shqipëri është e ngjashme me Greqinë e Portugalinë.
Banka Botërore: Shqipëri,<br />Biznesi në kushte si Greqia
Banka Botërore dhe Fondi Monetar janë të shqetësuar me situatën ekonomike në Shqipëri dhe perspektivat e saj. Dy zyrtarë të lartë të institucioneve kryesore financiare ndërkombëtare, Bankës Botërore dhe Fondit Monetar Ndërkombëtar, që ndodhen njëkohësisht në Tiranë, kanë zhvilluar dje bisedime me ministrin e Financave dhe guvernatorin e Bankës së Shqipërisë. Lidhur me këto bisedime, nga zyrat e shtypit të këtyre dy institucioneve është mbajtur heshtje totale, ndërkohë që, në një takim me studentë të Fakultetit Ekonomik të Universitetit të Tiranës, kryeekonomisti i BB Indermit Gill ka deklaruar se situata për biznesin në vend i ngjan shumë asaj në Greqi e Portugali.

Shqipëria nuk ka pasur ecuri të mirë të eksporteve, të cilat mbeten shumë të ulëta në raport me Prodhimin e Brendshëm Bruto; ka një pozicionim shumë poshtë në raportin ‘Të bësh biznes’, duke qenë e 85-a, kur Maqedonia është ndër 30 të parat; ka një borxh të lartë publik dhe produktivitet të ulët, deklaroi Gill. Sipas tij, në këto pika, Shqipëria u ngjan vendeve të Jugut të Evropës, që sot po vuajnë krizën e borxheve (Greqia, Italia, Portugalia dhe Spanja). “Klima është njëlloj si në Greqi e Portugali” tha ai.
“Nuk ka arsye që Shqipëria të jetë në vendin e 85-të për të bërë biznes, kur Maqedonia është në 30 vendet e para. S’ka arsye pse duhet të jetë e vështirë për të pasur energji, për të marrë leje ndërtimi, për të paguar taksat”. Nëse nuk i rregulloni këto probleme, do të përjetoni situata të ngjashme me ato, që ndodhën në Greqi, paralajmëroi Gill.

Përfaqësuesi i Bankës Botërore për rajonin ka paralajmëruar sërish qeverinë që të ulë nivelin e borxhit në raporte të pranueshme, që sipas tij duhet të ishin tek shifra 40% e Prodhimit të Brendshëm Bruto, nga mbi 60% që ka kapërcyer borxhi publik aktualisht. “Nuk është ide e mirë që, kur e ke një kufi me ligj, ta tejkalosh atë e më pas ta hedhësh poshtë këtë ligj”, shtoi Gill. Nuk janë qeveritë ato që përcaktojnë nivelin e duhur të borxhit, por është tregu që e bën një gjë të tillë. “Nëse tregu të jep hua me interesa të ulëta ose për një afat të shkurtër, atëherë ky është një sinjal se borxhi duhet të konsiderohet i lartë”, tha ai më tej.

DETYRIMET
Të gjitha të ardhurat që do të arkëtohen në buxhetin e shtetit nga privatizimet strategjike do të shkojnë për shlyerjen e borxhit që qeveria u ka kompanive private që kanë  kryer punë publike. Kështu deklaroi për median dje ministri i Financave Ridvan Bode, pas takimit me kryeekonomistin e BB Indermit Gill, kreun e Misionit të FMN-së në Shqipëri Nadeem Ilahi dhe guvernatorin e Bankës së Shqipërisë, Ardian Fullani.

Bode tha se u diskutua edhe mundësia e rritjes së taksave në një periudhë afatmesme, kur ekonomia të jetë rimëkëmbur.

(b.m/shqiptarja.com)

  • Sondazhi i ditës:
    25 Nëntor, 08:30

    Takimet jashtë, mendoni se diaspora do marrë pjesë masivisht në votime?

Lajme të tjera



×

Lajmi i fundit

“Goca e Kaçanikut” rikthehet në skenën e TKOB pas 45 vitesh

“Goca e Kaçanikut” rikthehet në skenën e TKOB pas 45 vitesh

26 Nëntor, 14:29 nga Blerina Goce