Barcelona 'prezanton' epokën Xavi 2, Laporta: Ekipi ka nevojë për stabilitet! Trajneri: Kemi harmoni me presidentin dhe Decon

Xavi Hernandez ka ndryshuar mendje dhe do vijojë të jetë trajneri i Barcelonës edhe pas këtij sezoni, paçka se në janarin e këtij viti njoftoi largimin. Drejtuesit katalanas kanë dalë në një konferencë të përbashkët ku pjesë e saj ishin presidenti Joan Laporta, trajneri Xavi dhe drejtori sportiv, Deco.

Në fjalën e tij Laporta tha se Xavi ka bërë një punë të mirë në ekip dhe ky i fundit ka nevojë për stabilitet.

"Kam kënaqësinë të njoftoj se Xavi vazhdon si trajner i ekipit të parë të Barçës. Ai bëri disa deklarata se kishte menduar të largohej, por dje më përcolli entuziazmin e tij për projektin dhe ekipin. Disa ndryshime dhe rregullime do e bëjnë ekipin më konkurrues. Që kur u takuam dje, ishte e qartë se ishte një lajm i mirë", tha Laporta për mediet.

LEXO EDHE:
GOLAT/ Shkëlqen Mbappe, Real Madrid fiton 4-2 kundër Sevillas dhe lë Barçën në vendin e tretë

Në të njëjtën linjë, ai siguroi se Xavi është personi ideal për të drejtuar një ekip me shumë të rinj.

"Kur analizojmë gjërat, trajneri ynë mendon gjithmonë më të mirën për Barçën. Është një lajm i mrekullueshëm që Xavi vazhdon. Ekipi që kemi, i cili po konsolidohet me shumë të rinj, ka nevojë për këtë stabilitet. Xavi është një referencë për të rinjtë dhe ne mund ta shohim këtë sot, jam veçanërisht i lumtur", vijoi ai.

Së fundi, Laporta donte të ishte e qartë se "bordi i drejtorëve, njëzëri, i ka dhënë mbështetje këtij vendimi. Të gjithë ata që morën pjesë në takim dhe folën me Xavin, më pas e uruan atë për vazhdimin e punës."

Xavi dhe Laporta

Në fjalën e tij, trajneri Xavi konfirmoi se ndryshoi mendim për largimin pas një mbështetje të madhe nga klubi, duke treguar harmoninë në ekip.

"Ju e dini që unë jam një tifoz i Barcelonës dhe gjithmonë përpiqem të bëj më të mirën për klubin. Gjëja më e rëndësishme është të mendojmë për klubin që i përkasim. Kur u takuam me presidentin, ia vura pozicionin tim në dispozicion.

Besimi i madh nga presidenti, pjesa sportive dhe gjithë bordi ka qenë shumë i rëndësishëm, ata më kanë bërë të shoh që ky projekt duhet të vazhdojë mirë, është një projekt fitues. Gjithashtu më bëri të shoh që unë duhet të vazhdoj para me fuqinë dhe aftësinë për të çuar përpara klubin", tha Xavi.

Më pas ai tha se kanë një raport të mirë edhe me tifozët.

"Nuk ka qenë një vendim i lehtë. Në janar i përcolla presidentit, Decos dhe bordit se ishte më e mira për klubin që të largohesha. Tani rrethanat kanë ndryshuar. Dje folëm shumë drejtpërdrejt për këtë. Është çështje egoje për të bërë mirë dhe jo parash. Lojtarët e dinë dhe raporti me tifozët është i mirë", tha trajneri i Barcelonës.

 

S.Dh/Shqiptarja.com

TAG:
• barcelona
• la liga
• Joan Laporta
• Xavi Hernandez