Bashkia e Vlorës kërcënon
zhdukjen e kioskave të gazetave

VLORE- Bashkia e Vlorës e nis luftën kundër ndërtimeve pa leje nga kioskat e gazetave. Institucioni i bashkisë po sulmon kioskat e gazetave me sipërfaqe jo më shumë se 4 metra katrorë, në vend të pallateve luksoze e shumëkatëshe, duke vënë në shënjestër kioskat e shpërndarjes së shtypit pa gjetur alternative të tjera, për mënyrën se si do shpërndahet shtypi i përditshëm në qytet.
 
Alarmi është dhënë nga gazetashitësit e qytetit të Vlorës, të cilët ankohen se kanë marrë një njoftim nga inspektorati i bashkisë për largimin e kioskave të tyre, në kushtet kur ata janë taksapagues të rregullt, dhe duke qenë se aktiviteti i tyre ka nisur me lejen dhe firmën e vetë bashkisë.
 
“Ka ardhur shkresa për prishjen e kioskës, jemi me leje nga bashkia dhe kemi kasë fiskale. Kemi paguar detyrimet dhe sigurimet. Shkresa urdhëron të heqim kioskën se qenkemi pa leje. Jemi ndër gazetashitësit e parë të aprovuar nga bashkia, kemi 17 vjet që me këtë kioskë mbajmë familjen. Bashkia të na gjejë një vend tjetër ku të shesim, po na thonë që do hapin vende pune, por deri tani po mbyllin vende pune”, u shpreh një gazetashitës.
 
Ndërsa një tjetër shprehet se “Ky vendim është i padrejtë, shumë familje ushqehen me këto kioska. Na është komunikuar një urdhër që do nisë aksioni për prishjen e kioskave, jemi taksapagues të rregullt, me leje nga bashkia. Do mblidhemi prapë te zyra e Ramës, po na prishen vendet e punës”.
 
Disa ditë më parë pronarët e kioskave u ngritën në protestë dhe shqetësimin e tyre e depozituan në zyrën e deputetit për qarkun e Vlorës, Edi Rama, me shpresën për të gjetur një zgjidhje, para se aksioni i largimit të kioskave të tregtimit të gazetave, të rrezikonte të linte të painformuar me shtypin e ditës qytetarët e një prej kryeqendrave të turizmit shqiptar.

Redaksia Online
(s.f/e.s/shqiptarja.com)