BE: Prishtina e Beogradi
të përgatiten për bisedime

BRUKSEL- Bashkimi Evropian zotohet se do të vazhdojë të ndërmjetësojë dialogun midis Kosovës dhe Serbisë, pas formimit të qeverisë së re në Beograd.
Por, Brukselit do t’i nevojitet një fazë konsultative me palët, rreth vazhdimit të bisedimeve.
Çështja kryesore që pritet të përcaktohet është nëse dialogu do të vazhdojë të cilësohet si teknik, apo do të përfshijë në vete edhe çështjen e veriut.
Aktualisht, të dyja palët e përfshira, tregohen të rezervuara duke pritur formimin e qeverisë së re në Beograd.
Në anën tjetër, Maja Koçiançiç, zëdhënëse e shefes së diplomacisë evropiane Kethrin Eshton, thotë se Brukseli ua ka bërë të qartë palëve se dialogu do të vazhdojë.

“Jemi nw pritje që të formohet shpejt qeveria e re në Beograd, dhe më pas do të konsultohemi me të dyja palët se kur dhe si do të procedojmë, por ne e kemi bërë të qartë se dialogu është në interesin e të dyja palëve, si Serbisë ashtu edhe Kosovës”.

“Ato janë çështje praktike që kërkojnë zgjidhje dhe ne do të punojmë mbi këto baza. Dialogu do të vazhdojë. Gjithashtu ka çështje që duhen adresuar siç është ajo e zbatimit të marrëveshjeve tashmë të arritura”, ka thënë Koçiançiç.
Insistimi i Brukselit për vazhdimin e dialogut, nuk është duke u pritur me entuziazëm as nga Prishtina, dhe as nga Beogradi.

Përderisa presidenti i ri serb Tomisllav Nikolliç, gjatë fushatës kishte deklaruar se ai nuk do t’i respektojë marrëveshjet e arritura, nëse ato janë në kundërshtim me interesat e Serbisë, në Prishtinë ka një fjalor më të butë politik duke e kushtëzuar vazhdimin e bisedimeve me zbatimin e marrëveshjeve të arritura deri më tash.

Zëvendëskryeministri i Kosovës Hajredin Kuçi, thotë se Qeveria e Kosovës pret që para vazhdimit të bisedimeve të zbatohen marrëveshjet e arritura.

“Ne jemi duke menduar që të zbatohen konkluzionet e arritura deri më tani. Ato kanë qenë bisedime ndërshtetërore midis Kosovës dhe Serbisë dhe pastaj do të shohim se si do të shkojnë gjërat”.

“Ne presim që ato të zbatohen, këtu garant janë BE-ja e natyrisht edhe SHBA-të dhe të tjerët dhe unë besoj se serioziteti i këtyre bisedimeve që kanë ndodhur deri më tani, cilësia e tyre por edhe përkushtimi për të ardhmen duhet të tregohet me hap konkret për implementimin e marrëveshjeve”,ka deklaruar Kuçi.

Dialogu Prishtinë – Beograd ka hyrë në një udhëkryq të ri, pas fitores së Tomisllav Nikoliçit në zgjedhjet presidenciale në Serbi, i njohur për qëndrime nacionaliste në raport me shqiptarët dhe Kosovën.

Analistët politikë në Prishtinë madje kanë paralajmëruar që Nikoliç mund të përqendrojë politikën e tij, tash e tutje në veriun e Kosovës duke i rikthyer ambiciet serbe për shkëputjen e kësaj pjese nga Kosova.
(b.a/shqiptarja.com)