Begaj dhe Nikolla takojnë Ambasadoren e BE-së, i dorëzon raportin e KE! Presidenti: Do të shërbejë si udhërrëfyes për vijijim e reformave në vend

Presidenti Begaj priti sot në një takim ambasadoren e BE-së në Shqipëri Christiane Hohmann. Kreu i shtetit pohoi se raporti i KE-së do të shërbejë si udhërrëfyes për Kuvendin e Shqipërisë.

‘Prita sot Ambasadoren e Bashkimit Evropian në Shqipëri, znj. Christiane Hohmann dhe u njoha me raportin e progresit për Shqipërinë.

Duke vlerësuar mbështetjen e vazhdueshme, që Komisioni Evropian dhe vendet e BE-së, i kanë dhënë Shqipërisë gjatë rrugëtimit në procesin e integrimit, konfirmova se anëtarësimi i Shqipërisë në BE është dhe mbetet një prioritet strategjik i dhe objektiv i pandryshueshëm.

LEXO EDHE:
Data për zgjedhjet 2025/ PD refuzon ftesën e Presidentit: Konsultime farsë! PL: S’pranojmë datën e caktuar nga Balla! Basha: Rëndësi ka standardi (VIDEO)

Ky raport do të shërbejë si një udhërrëfyes i paanshëm për Kuvendin e Shqipërisë, Qeverinë dhe të gjitha institucionet përgjegjëse për vijimin e reformave në vend.

Konsensusi dhe mbështetja e agjendës së integrimit nga pozita dhe opozita është e domosdoshme për përparimin e reformave dhe adresimin e gjitha çështjeve të ngritura në raport.’- shkroi Begaj.

Kryetarja e Kuvendit, Lindita Nikolla, e priti gjithashtu Ambasadoren e BE. Ajo  i dorëzoi Raportin e Komisionit Evropian për Shqipërinë, 2022.

Kryetarja Nikolla vlerësoi se Raporti përmban arritjet e rëndësishme të Shqipërisë në procesin e integrimit evropian, të cilat shpunë në vendimin e Këshillit Evropian për çeljen e negociatave si edhe rekomandime të rëndësishme për të adresuar e përmbushur më mirë standartet e BE-së në disa aspekte të zhvillimit.

Ka filluar puna për rishikimin e kuadrit ligjor për rolin e Kuvendit në procesin e integrimit evropian  dhe Rregullores së Kuvendit, për përmirësimin e tyre në funksion të forcimit të rolit ligjvënës e kontrollues të Kuvendit gjatë procesit të negociatave të anëtarësimit. Kuvendi po punon gjithashtu për forcimin e kapaciteteve administrative dhe burimeve njerrëzore të strukturave që mbulojnë çështjet e integrimit evropian.

 Nikolla vuri në dukje se  organizimi dhe programimi i veprimtarive të komisioneve parlamentare do të bëhet në bazë të kapitujve të negocimit dhe komisionet parlamentare do të fokusohen në shqyrtimin ex-post të legjislacionit.

Duke garantuar legjitimitetin demokratik të procesit të integrimit, Kuvendi do të fokusohet edhe në kontrollin parlamentar të Qeverisë dhe realizimin e detyrave të institucioneve të pavarura  për plotësimin e standarteve të integrimit evropian.

Ambasadorja Christiane Hohmann  vuri në dukje se Raporti pasqyron në mënyrë korrekte arritjet e Shqipërisë dhe rolin e rëndësishëm të Kuvendit në procesin e integrimit. Është e rëndësishme që reformat e nisura demokratizuese dhe integruese të vazhdojnë dhe rezultatet e tyre të jetohen e ndjehen nga qytetarët shqiptarë. Ndryshimi dhe përmirësimi i legjislacionit dhe harmonizimi me standartet e BE-së është një proces i gjatë dhe ndihma jonë nuk do t’ju mungojë.

G.MO/Shqiptarja.com

TAG:
• Bajram Begaj
• Christiane Hohmann
• KE
• Lindita Nikolla
• progres raporti i KE