Belgjikë/ Dyshohen për disa vjedhje, arrestohen tre shqiptarët

Tre shqiptarë janë arrestuar në Belgjikë pasi akuzohen për kryerjen e disa vjedhjeve. Sipas mediave belge, shqiptarët e moshës 24, 36 dhe 37 vjeç, dyshohet se kanë kryer disa vjedhje në fillim të shkurtit të këtij viti në Hageland, Linter dhe Zoutleeuw.

Policia belge në Getevallei arriti të bënte një lidhje mes makinës që ishte përdorur nga shqiptarët në kryerjen e tre vjedhjeve. Në fillim të muajit mars, policia pranë Mechelen kontrolloi një makinë tjetër ku ndodheshin tre shqiptarë, të cilët nuk ishin në gjendje të sqaronin për policinë vendase pse gjendeshin në Belgjikë.

Kjo makinë rezulton të jetë e regjistruar në të njëjtën adresë me makinën e lidhur me vjedhjet. Përveç kësaj, policia ka gjetur që tre telefonat celularë të shqiptarëve kanë lidhje me vjedhjet në Hageland.

Në këtë mënyrë autoritetet belge kanë bërë të mundur zbërthimin e enigmës.

Një prej të dyshuarve ka mohuar gjithçka, ndërsa dy të tjerët kanë refuzuar të japin shpjegime. Të premten do të vendoset në gjykatë nëse do të vijojnë të qëndrojnë në paraburgim ose jo.

G.K/Shqiptarja.com

TAG:
• belgjike