Beogradi këmbëngul për Haradinaj
“Kemi 30 dëshmitarë kundër tij”

Pas vendimit të djeshëm të gjykatës së Colmarit të Francës për lirimin me kusht të kryetarit të AAK-së, Ramush Haradinaj, ka reaguar menjëherë Qeveria e Serbisë e cila nuk heq dorë nga kërkesa për ekstradim.

Në mbledhjen e sotme urgjente, ministrja e  Drejtësisë në Serbi, Nela Kuburovic ka thënë se nuk do të heqin dorë nga kërkesa për ekstradimin e Haradinajt. Lajmi konfirmohet nga mediat vendase.

“Nuk heqim dorë nga ekstradimi. Hetimi tashmë përfshin edhe 30 dëshmitarë të rinj”, ka thënë Kuburovic.

Qeveria serbe u mblodh të premten në një takim emergjent pas vendimit të gjykatës së apelit në Colmar të Francës lindore për të liruar me kusht ish kryeministrin e Kosovës, Ramush Haradinaj, që u ndalua në fillim të janarit në bazë të një urdhër arresti të lëshuar nga autoritetet serbe.

Lirimi i tij me kusht nxiti reagimin e Beogradit. Presidenti serb Tomislav Nikoliç, tha se ky është rezultat i trysnisë së vendeve të Bashkimit Evropian.

Qeveria e Serbisë kërkoi këtë të premte ekstradimin e menjëhershëm të zotit Haradinaj, ndërsa u kërcënua se do të hakmerret jo vetëm ndaj Francës por edhe të gjitha vendeve tjera që injorojnë urdhër arrestet serbe.

Një ditë më parë kreu i AAK  Ramush Haradinaj u liruar me kusht nga gjykata e Colmar në Francë ku ndodhej në paraburgim pas një urdhërarresti të lëshuar nga Serbia e cila e akuzon për krime lufte. 

Haradinaj do të pres në Francë deri në përfundimin e shqyrtimit të kërkesës së Serbisë për ekstradimin e tij.

Ndërsa Serbia i ka dërguar në gjuhën frënge drejtësisë franceze të gjithë dosjen ku kërkon ekstradimin e ish komandatit të UCK-së.

Redaksia Online
e.m/Shqiptarja.com